Politiit nalliuttunit nalunaarsuinerat: Siornarnit nalunaarutit ikinnerusut
Juullimi 2022-milu ukiutoqqami pisut ikinnerullutillu ilungersunannginnerusut Kalaallit Nunaanni politiit suliaraat, taakku nalliuttuni ulapinnerunissartik piareersimaffigisimavaat.
Politiit juullip ukiortaallu akornanni ullut qulit missaasa ingerlanerini nuna tamakkerlugu tuusintinit amerlanerusunik nalunaarfigineqarput. Politiit tusagassiuutinut nalunaarummi taama ilisimatitsipput.
Naak amerlagaluartut siornarnit ikinnerulaarput, taamaattorli piffissami ulapiffiusunut sanilliullugit suli amerlapput.
Juullikkut nalaanni nuna tamakkerlugu nalunaarutit 1.099-t politiinit nalunaarsorneqarput. 2021-mut sanilliullugit 100-t missaannik ikinnerullutik.
Ulapinnissamut piareersimasut
Pigaartoqarfik aamma sinerissami politiit sinneri ulapinnissamut piareersimalluarput, taamaattumillu juullikkut ukiortaarsiortoqarneralu politiinut annerusumik tupaallannartoqanngilaq, pigaartoqarfimmi aqutsisoq Brian Thomsen oqaluttuarpoq:
- Ulapippugut – kisianni ernumagisatsinnit ulapinnginneruvugut. Ilaatigut piareersarluarsimanitsinnik aamma ukiup siulianut sanilliullugu suliat ilungersunarnerusut ikinnerunerannik tamanna pissuteqarpoq, ilaatigut taamanikkut ullut arlaqanngitsut ingerlaneranik toqutsisoqarneranik suliat marluk suliaraavut. Tamatuma tungaatigut ukioq manna eqqissisimaffiuneruvoq, Brian Thomsen oqarpoq.
Ukiortaaq ataatsimut isigalugu ulapiffiuvoq. Politiit tassani piffissami 30/12-22-mit ulloq 3/1-23 ilanngullugu pisunik 618-inik nalunaarsuipput, taakkunannga 124-t sulianik aallartitsiffiupput.
- Ukiutoqaq immikkut isiginiaraanni siornamut sanilliullugu nakkutigilluarneqarpoq, pisullu assigiinngitsut nalunaarsorneqartut tamangajammik, pisullu katinneri appariarfiupput. Ajoraluartumik ukioq manna pinngitsaaliilluni atoqateqarnerit siornarnit ataatsimik amerlanerupput, kisianni ataatsimut isigalugit ineriartorneq pitsaavoq.
Ukioq manna toqutsisoqarneranik suliaqartoqanngitsoq
Juullikkunni suliat ikinnerusut nalunaarutigineqaraluartut, suliat amerlanerusut aallartinneqarsimapput, Brian Thomsenillu tamanna nassuiaatissartaqarluarnerarpaa.
- Pisut suuneri apeqqutaallutik aamma ukioq manna eqqissisimaffiunerani suliat ingerlaannaq aallartinneqarnissaannut sulisussaqarnikuuvugut. Siorna suliat ilungersunarnerusut ingerlaannaq aallartinnissaat salliutittariaqarnikuuagut, pisullu sinneri ullualunni aallartinnissaannut utaqqisitsisoqartariaqarluni, ilaatigut toqutsisoqarsimaneranik suliat marluk ingerlakkatsigit.
Ataani takusassiami piffissami 2021/2022 aamma 2022/2023 suliat suuneri takuneqarsinnaapput.
