Politiit pinerlineqarsimasunik ujaasipput: Annersaasoqarnerani angutit marluk tigusarineqartut
Nuummi Politiit angutinik inuusuttunik marlunnik arfininngornerup ullaassaani tigusarinnittariaqarsimapput. Angutip aappaata imerniartarfiup silataani inuit tilloriartaarsimavai. Pisumi annersarneqarsimasunik politiit oqaloqateqarumapput.
Politiit tallimanngornermi unnukkut arfininngornerullu ullaassaani ulapputeqangaatsiarsimapput.
Kalaallit Nunaata Politiviini pigaartut aqutsisuat, Julie Senderovitz Bendtsen Sermitsiaq.AG-mut ilisimatitsivoq Nuummi imerniartarfiup silataani perulluliortoq pillugu politiit aggeqquneqarsimasut.
- Angut inuusuttoq imerniartarfiup Daddysip silataani kamassimavoq inuillu saneqquttut tilloriartarsimallugit. Politiit eqqissisaanerminni tigusarinninniarnerminnilu imerniartarfiup matulerisuinit ikiorluarneqarput, Julie Senderovitz Bendtsen oqaluttuarpoq.
Pisoq pillugu politiit arfininngornerup ullaassaani nal. 03.21 nalunaarfigineqarput.
Peberspray atorneqartariaqarsimasoq
Politiit imerniartarfiup silataanut tikiunnerminni angut inuusuttoq eqqissisarniarsimagaluarpaat. Eqqissisinnaanngimmalli tigusariniartariaqalersimallugu.
- Angut eqqissisaraluarlugu eqqissisinnaanngimmat politiit mianersoqqusipput ilisimatillugu peberspray atortariaqassallugu. Pisoq ineriartupiloorpoq, tigusarinninniartoqarneranilu politiit allanit aamma ajattarneqarsimallutik, pigaartut aqutsisuat oqarpoq.
- Politiit aalajangerput angut pebersprayimik seqqartariaqarlugu. Seqqartereernermi kingorna angut tigusarineqarsinnaalerpoq. Politiit allat ikiuuttussat takkuttut, angutip ikinngutaa aamma tigusaraat, politiit suliniarneranni akornusersuimmat, oqarpoq.
Pinerlineqarsimasunik ujaasisut
Angutit inuusuttut tigusarineqartut 20-t sinnilaarlugit ukioqarput, arfininngornermilu ullaap tungaani iperagaasimallutik.
Angutilli tillusseriartarnermini annersissimasaanit politiit suli saaffigineqarsimanngillat.
- Nalunaartoqarnerani oqaatigineqarpoq angut imerniartarfiup Daddysip silataani saneqquttunik tillussisaqattaartoq. Inuit pinerliffigineqarsimasut taamaattumik oqaloqatigerusuppagut, Julie Senderovitz Bendtsen oqarpoq.
Angutit inuusuttut unnerluutigineqassanersut maanna oqaatigisinnaanngilaa.
Pisunili taama ittuni unataasimasutut, pisortani sulisunik unataasimasutut aamma politiit sulinerannik pinngitsoortitsiniarsimasutut unnerluutiginnittoqarsinnaasarpoq.