Politiit pisortaat: Annertuumik imigassartortarneq ajornartorsiutaavoq
Immiaaqqat akitsornerat politiinit isigalugu pitsaavoq. Tamanna annertuumik imertarnerup, pinerlunnermik kinguneqartartup annikinnerulernissaanut periarfissaavoq, politiit pisortaat Bjørn Tegner Bay oqarpoq.
Sodavandit immiaaqqallu akisunerujussui pillugit, sapaatip akunnerini arlalinni annertuumik oqallittoqarpoq. Nioqqutissat ulluinnarni pisariaqartinneqartut allallu sorsunneq coronallu kingorna sunniutinit pilersunik akit qaffanneri, inunnik toqqissisimajunnaarsitsivoq inuiaqatigiinnilu naammagittaalliornermik pilersitsilluni.
Aviisi AG taama allappoq.
Assersuutigalugu pisiniarfinni sulisut siunissami immiaararsisartussat, immiaaqqanik pisiarisartakkaminnik pisinissamut akissaarunnissaat ilerasuutigaat. Qujanartumilli taakku ikittuinnaapput, Birgit Niclasen sapaatit akunnialuisa matuma siorna AG-mut oqarpoq.
Bjørn Tegner Bayillu tamatuminnga isumaqatigaa. Imerajuttuiit amerlanngillat, taakkulu politiinut ajornartorsiortitsineq ajorput, politiit pisortaat oqarpoq.
- Politiit isaannit isigalugu ajornartorsiuterput tassaavoq annertoorujussuarmik imigassartortarneq. Tassa inuit piffissap annertunersaani aalakkoorneq ajortut, imigassartuleraangamilli annertuallaarujussuarmik imigassartortartut. Inuit taakku imigassap pissarsiariuminaannerunera, akisunerulernera pissutigalugu imigassartornikinnerulerpata, tamanna uanga isinnit isigalugu eqqissisimanerunermik pinerlunnerillu annikinnerulernerannik kinguneqassaaq, taanna oqarpoq.
Aviisimi AG-mi atuarnerusinnaavutit. Aviisi uani pissarsiariuk:
