Politiit: Unnerluussinerit amerlavallaaqaat
Sapaatip akunnerani kingullermi Ilulissani aqqusinikkut angallannermi misissuinermut atatillugu politiit 50-it sinnerlugit unnerluussipput. Unnerluussinerit amerlanersuat tupaallaatigineqarpoq
50-it sinnerlugit unnerluussinerit.
Sapaatip akunnerata kingulliup ingerlanerani Ilulissani aqqusinikkut angallannermi misissuinermi politiit taamatut amerlatigisunik unnerluussaqarput.
- Amerlavallaarujussuaqaat. Ajoraluartumik, Ilulissani politiit ulluinnarni pisortaat Karl Vinther, avannaanilu politeeqarfimmi pisortaagallartoq, oqarpoq.
Taanna Sermitsiaq.AG-mut oqaluttuarpoq inatsisinik unioqqutitsinerit amerlanerpaat pissuteqartut meeqqat bilini qiterutaasaqartinneqannginnerannik.
- Soormitaava taama amerlatigisut unioqqutitsisimappat?
- Tamanna apeqqutitsialaavoq. Politiit immaqa tamanna sammivallaartarsimanngilaat. Ajornartorsiutip annertussusia ilisimasimagunanngilarput. Ilisimasimavarpulli ajornartorsiut iliuuseqarfigisimarisaqaripput. Ilimagisatsinnillu ajornartorsiut annertunerusimavoq.
- Inuit ilungersortumik qinnuigisariaqarpavut aqqusinermi angallannermut inatsit, 2008-mi oktobarip aallaqqaataani nunami maani atuutilersoq, malillugu meeqqat biilimi qitequtaasaqartinneqarnissaannik piumasaqaat maleqqullugu, Karl Vinther oqarpoq, ilanngullugulu oqaatigaa aqqusinikkut angallannermi inatsimmi nalornisoqaruni kikkut tamarmik politiinit siunersorneqarnissaminnut najoqqutassinneqarnissaminnullu tikilluaqquneqartut.
Tamanna peqatigalugu oqaatigaa taxat, meeqqanik pingasut inorlugit issiavinni tunorlerni ilaasullit, meeqqat biilimi qitequtaasaqartinneqarnissaannik piumasaqaammut ilaatinneqanngitsut.