Politikikkut-aningaasaqarnikkut nalunaarusiaq siunertalik

Peqatigiiffiugaluarpugut pingaarnertut inuussutissarsiornerup soqutigisallu ineriartornissaannik sammisaqartoq, taamaattorli aamma pisinnaasanik qaffassaaneq isumaginninnikkullu ajornartorsiutit aaqqiivigineqarnissaat GAp pingaartilluinnagarai. Minnerunngitsumik meeqqat inuussuttullu atugaat ineriartornissamullu periarfissaat eqqarsaatigalugit.

Taamaattumik nalunaarusiami immikkoortoq meeqqanut inuusuttunullu tunngasoq naammagisimaarparput, taakkulu tungaasigut naalakkersuisut suleqatiginissaat qilanaaraarput.

Illuanut illuanullu ingerlasoq
GA-mi suleqataasarlutalu suliffeqarfiup isumaginnikkut akisussaaqataanera nukittorsartuarparput. Tassaungali tunngatillugu tikkuarumavara akisussaaqataaneq taanna illuanut illuanullu ingerlasinnaammat.

Akerlianilli naatsorsuutigaarput namminersorlutik oqartussat nunatsinni suliffeqarfiit tapersersussagaat pisortat suliffeqarfiuterpassui nunatsinni tunisassianik pisitittarlugit suliassallu nunatsinniitiinnartarlugit. Inuussutissarsiornitta qaffakkiartorlunilu ineriartorneratigut aatsaat inuiaqatigiit suliaqarnerulerlutillu isertitaqarnerulernissaannik takorluukkat piviusunngorsinnaapput.

Soorunalimi ilinniartitaanikkut suliniutit kinguneqariartilernerat naammagisimaarparput, meeqqalli atuarfiata pitsaassusiata isigineqaqqinnissaa inassutigeqqissavarput, taanna qaffasinnerusumik ilinniagaqarnissamut qaffakkiartornissanullu allanut tunngavissaammat. Inuussutissarsiornermut tunngatillugit tassani tikkuarneqartut naammagisimaarpagut, inuussutissarsiornerup naleqqussaanermik tunngaveqartumik ineriartortinneeqarnissaa tikkuarneqarsimammat. Pingaartumillu aalisarnerup iluarsaateqqinneqarnissaa qangali pisariaqalersimasoq kiisami piviusunngortinneqartunngortussanngorsimgunarmat. Naalakkersuisut nalunaarusiami inuussutissarsiorneq pillugu isummersorput GAp, minnerunngitsumillu inuusunnerusut taarsiiartuaarnissaannut naapertuulluinnartumik. Taamatuttaaq nuannersuuvoq piviusorpalaartumik isummersuutigineqarmat »uuliasiortoqalerpat aningaasaqarnerput iluarrsiumaarmat utaqqiinnarsinnaavugut«-mik eqqortuunngitsoq. Kalaallit Nunaanni inussutissarsiornikkut periarfissaalersussat aamma GAp pissanganartutut isigai isumalluarfigalugillu. Massakkulliuna inuussutissarsiornerput inuiaqatigiit ineriartornissaannut tunngavissaasoq. Minnerunngitsumik sulifissaqartitsinerup ineriartortuarnissaa pillugu suliffeqarfinnik ingerlalluartunik nutaanik ilaqarluni. Suliffeqarfiilli nutaassat immikkut malittarisassiuunneqarnissaat mianersoqqussutigaarput. Taamaaliorneq unammilleqatigiinnermik equtitsissaaq, malittarisassallu immikkut ittut aama suliffeqarfinnut allanut kinguneqarnerlorujussuarsinnaapput.

Nunaqavissunik sulisoqaritsi
Aatsitassarsiornermut tunngatillugu suliffeqarfiit sulisussallu nunatsinniittut atorniarneqarmata naammagisimaarparput, tamannami aanna GAp SIK-llu naalakkersuisunut saaffiginnissutigisartagaanut naaertuummat. Inuussutissarsiornermut inatsimmik nalilersueqatigiinnissaq qilanaaraarput. KIssaatigaarpullu aamma kalaallit suliffiutaasa aatsitassarsiornermi salliutinneqartarnissaat erseqqissaatigineqarluassasoq, tamanna oqalugiarnermi oqarluartaarutaannaanani piviusumik anguniagaaniassammat. Allanngornerit annertuut pisariusinnaasarnerat paasilluarparput, pisortalli inuussutissarsiornermut peqataanerata erseqqinnerusumik oqaasertalersorneqarnissaa maqaasinartipparput. Pingaartumik ajornanngitsutigut namminersortunngorsaasoqarnissaa eqqarsaatigalugu. Tassami namminersortut amerlaneruppata inuiaqatigiinni ingerlalluartoqarnerulissaaq, tamannalu aamma ilaatigut nalunaarusiami »Kalaallit Nunaata aningaasatigut nammiliilernissaanut tunngavissat«-mi tikkuarneqarnikuuvoq.

Kalaallit Nunaanni Namminersorlutik Oqartussat suliffeqarfinnut peqataajuarnissaat, soorlu Alcoamik piginneqataanikkut, mianersoqqussutigissavarput. Inassutigissavarput periarfissaq taanna massakkumiilli matuneqariissasoq. Ilaatigut pisortat inuussutissarsiornermut peqataaneruleqqinnissaat pinngitsoortikkumallugu, aammali inuiaqatigiit aningaasatigut nalorninartorsiornermut peqataanissaminnut akissaqanngimmata. Titarnerit akornanni atuarsinnaavarput naalakkersuisut inuiaqatigiinnut tapiissuteqartarneq qaangeriartuaarniaraat. GAp tassunga tunngatillugu inassutigissavaa, inuussutissarsiornermut tapeeriaatsit tamarluinnarmik misissuiffigineqassasut.

Taamaaliornikkut tapiissutit ingerlatseriaatsimik allannguinissamut atorneqalissapput – ingerlatseriaatsinik aningaasatigut imminut napitilernissamik kinguneqarnavianngitsunik ataavartitsinermut pinnatik.

Aningaasaqarnermut naalakkersuisoqarfiup politikikkut-aningaasaqarnikkut nalunaarusiaa tamaat ataatsimut isigalugu naammagisimaarparput, pingaartumik isummat suliniutillu GAp pisariaqartutut siunissaqartutullu isigisai tunngavigalugit. Neriuppugut anguniakkat piviusunngortinneqarnissaat pillugu sapinngisamik silittumik suleqatigiittoqarumaartoq. Nunatsinni tamarmi sumiiffinnilu aammalu kattuuffinni sulliniaqatigiiffinnilu.