Politikkeri: Nunatsinnut nuuttut qinersisinnaatitaanerat killilerneqartariaqarpoq

Inatsisartut pilersaarutit malillugit sisamanngornermi oqaluusserissavaat, Danmarkip naalagaaffianni innuttaassusillit nunatsinnut nuuttut qinersisinnaatitaanerisa killilerneqarnissaat pillugu siunnersuut.

Siumumi politikkikkut oqaaseqartartoq Doris J. Jensen tamanna pillugu ukiakkut ataatsimiittoqarnerani apeqquteqaat aallaavigalugu oqallittoqarnissaanik siunnersuuteqarsimavoq.

Taassuma innersuussutigaa Inatsisartunut qinersineq pillugu inatsit, tassani allassimavoq, kinaluunniit qallunaatut innuttaassuseqartoq, 18-inik ukioqalereersimasoq qinersinissarlu sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasoq.

Politikkeript tamanna apeqquserpaa:

- Kulturimik nunatsinnilu politikkimik ilisimasaqanngitsut

- Inatsit taanna tunngavigalugu, avataaneersut Kalaallit Nunaannut nuukkunik, kalaallit kultooriannik ilisimasaqanngikkaluarunilluunniit polikkimullu malinnaasimanngikkaluarlutik ukiup affaannaa nunatsinniissimagunik qinersisinnaatitaanngortarput.

- Isumaqarpugut aaliangersimasumik najugaqarnermut nalunaarsorsinnaatitaanermut piumasaqaatip ukiunut marlunnut inissinneqarnissaa imminermini naapertuuttoq, Doris J. Jensen oqallissaarumminut tunngavilersuilluni allappoq.

Taamatullu isumaqarneq Siumukkunni nutaajunngilaq. Partiimimmi 2017-imi tassunga assingusumik apeqquteqaat aallaavigalugu oqallitsitsisoqarsimavoq, taamanikkut partiimit anguniarneqarsimalluni ukiut marluk ukiulluunniit arfineq-marluk nunatsinni najuqaqarsimasariaqartoq qinersisinnaatitaalertinnani.

Naalakkersuisulli malittarisassanik allanngortitsinissamik siunnersuut tapersinngilaat. Tamanna Doris J. Jensenip parteeqataaata Isumaginninnermut, Suliffeqarnermut Nunamullu Namminermut Naalakkersuisup Jess Svanep (S) akissutaani atuarneqarsinnaavoq.

Svane: Tamat oqartussaanerannut naapertuutinngitsoq inuit ilaat isumaqarsinnaapput

Svanep akissuteqarnermini innersuussutigaa, Naalagaaffimmi innuttaassusillit nuuttut nunami ukiut marluk najugaqareersimagunik aatsaat qinersisinnaalertarnerat tamat oqartussaanerannut naapertuutinngitsoq inuit ilaasa isumaqarsinnaanerat.

- Pingaartumik inuit piffissami tassani Kalaallit Nunaanni sulillutillu akileraartarpata. Kalaallit inatsisaat malittussaavaat Inatsisartullu katiternerinut aalajangeeqataanissaat pissusissamisuussagaluarpoq, Jess Svane allappoq, nangillunilu:

- Nunatsinni najugaqavissuusugut taama ikitsigitilluta innuttaasut soqutigisaannik illersuineq, taamaalillutillu avataaneersut nunatta ineriartorneranut sunniuteqapallannginnissaat pissusissamisoortuusoq allat isumaqarsinnaapput.

Naalakkersuisup erseqqissaassutigaa, Naalakkersuisut Inatsisartut malittarisassanik maannakkut atuuttunik sukaterinissamut isumaqataanerminnut isumaqataannginnerminnulluunniit tunngavilersuutaasa tusarnissaat qilanaarigaat, Naalakkersuisulli naalagaaffimmi innuttaassusillit qaammatit arfinillit taakku saniatigut killilersunnginnissaat kissaatigigaat:

Isumaqatigiissummut akerliusoq

-Innuttaasut sinneri naligalugit inuiaqatigiinni ineriartortitseqataassammata, Jess Svane allappoq.

Naalakkersuisup aamma Inatsisinut Ataatsimiititaliap isumaliutissiissutaa innersuussutigaa, ataatsimiititalimmi sukaterinissamik siunnersuummut atatillugu ajornartorsiutaasinnaasut eqqaavai:

“Inatsiseqartitsinikkut pissutsinik, naalagaaffimmi innuttaassuseqatinut naalagaaffiup ilaaniit allaniit nuussimasunut aatsaat ukiut marluk tallimalluunniit qaangiunnerini Inatsisartunut qinersisinnaatitsisunik qinigassanngortitsisinnaatitsisunillu eqqussineq Innuttaasutut politikkikkullu pisinnaatitaaffiit pillugit Naalagaaffiit Peqatigiit isumaqatigiissutaat naapertorlugu Kalaallit Nunaata nunani tamalaani pisussaaffiinut unioqqutitsisutut isigineqartariaqarput.”

Oqallissaarut Inatsisartut sisamanngornermi oqaluuserisassaannut ilanngunneqarsimavoq.