Politikkerit pisassiissutinik akuersissutinillu tunniussinermi politikkikkut akuleruttoqartannginnissaa misissoruppaat

Alisarnermut Piniarnermullu Naalakkersuisup Aqqaluaq B. Egedep aalisartut politikkerinut toqqaannartumik saaffiginninnermikkut aalisarsinnaanermut akuersissutinik pisassiissutinillu qanoq pissarsisarsimanerat pillugu qanittukkut oqaaseqarnera oqallitsitsilersimavoq.

Naleqqameersupq Jens Napaattuup naalakkersuisup ajornartorsiutaasumik saqqummiussisimanera nersualaarpaa.

- Naalakkersuisoq oqallitsitsinissamut qunussuteqannginnami nersugassaavoq, taanna oqarpoq.

Akerlianik Jens-Frederik Nielsenip naalakkersuisuusimasut pissaanermik atornerluisimasutut pasillerlugit oqaaseqarsimaneq isornartorsiorpaa.

Erseqqinnerusumik misissorneqartariaqartoq

Taassuma oqaatigaa, politikkerit pisassiissutinik aalisarsinnaanermullu akuersissutinik tunniussinissamut sunniuteqartarsimappata, tamanna iternga tikillugu misissuiffigineqartariaqarpoq, tamatumalu kingorna kinguneqartitsilluni.

Aqqaluaq B. Egedep tamatuma kingornatigut erseqqissaassutigisimavaa, taamatut oqaaseqarsimanermini naalakkersuisut aalisartut ikiorniarlugit, atorfilittat malittarisassat atuuttut malillugit suliassanik suliaqartittarsimagaat pisimallugu, tassa kikkut pisassiissutinik aalisarsinnaanermullu akuersissutinik pissarsitinneqassanersut pillugit sunniinniartarsimanngitsut.

Atorfilittat taamatut pisoqartarsimanera uppernarsarsimavaa, aamma Erik Jensenip (S) oqaluttuarisimavaa, aalisarnermut naalakkersuisuunermini aalisartut imminerminut attaveqarsimasut ikiorniarlugit qinnuteqaatit sukkanerusumik suliarineqartarnissaat isumagisarsimallugu.

Politikkerit aqutsinatik sinaakkusiissasut

Sullissineq arriikkaluarpalluunniit naalakkersuisut sulianut ataasiakkaanut akuliuttussaanngitsut, Jens Napaattooq isumaqarpoq.

- Politikkerit inatsit malillugu aalisarsinnaanermut akuersissutinik pisassiissutinillu tunniussinissamut sinaakkusiisussaapput, tunniussinissamullu politikkikkut akuleruttoqartassanngilaq, soorlu Aalisarneq pillugu Ataatsimiititaliarsuarmit tamanna anguniarneqartoq, taamaalillunimi kimut sianerneq kikkunnillu ilisarisimasaqarneq apeqqutaatinnagit tamarmik assigiimmik pineqartalissapput.

Aalisarneq pillugu Ataatsimiititaliarsuup inassuteqaatigisimavaa, pisassiissutinik aalisarsinnaanermullu akuersissutinik tunniussinissamut aalajangiisartunut politikkerit akuleruttannginnissaat anguniarlugu nutaamik aaqqissuussisoqassasoq.

- Aalisartut naalakkersuisumut attaveqarnermikkut siullinngortinneqartarsimanerat ajornartorsiutaavoq annertooq. Uanga isumanga malillugu aalisarsinnaanermut akuersissutit piumasaqaatitut aalajangersakkat tunngavigalugit tunniunneqartartussaapput. Politikkerit aalajangersinnaappata inuit kikkuuneri malillugit imaluunniit nammineq piumasarisaq malillugu pisassiissutinik tunniussisoqassasoq, taava annertoorujussuarmik ajornartorsiuteqarpugut, Demokraatit siulittaasuat Jens-Frederik Nielsen oqarpoq, itisiliillunilu oqaatigalugu:

Ammasuunissaq politikkikkullu akuleruttoqannginnissaa

- Isumaqarpunga Aalisarneq pillugu Ataatsimiititaliarsuup politikkikkut akuleruttoqartannginnissaata atuutsinneqalernissaanik oqaaseqarsimanera eqqortuusoq. Aalisarsinnaanermut akuersissutit piumasaqaatit kikkunnut tamanut periarfissiisussat malillugit tunniunneqartartussaapput. Malittarisassammi taamaapput, taamaammat Aqqaluaq B. Egedcep oqaaseqarsimanera tupaallaatigaara, taanna oqarpoq.

Taanna Jens Napaattoorlu isumaqarput, politikkerit akuleruttannginnissaannik aaqqissuussinikkut aalisartut politikkerillu illersorneqassasut. Ammasumik agguaasisoqartassaaq aamma agguaassinermi politikkerinik sunniuteqarsinnaasunik peqataasoqartassanngilaq. Aalisarneq pillugu Ataatsimiititaliarsuup aamma inassutigisimavaa, pisassiissutigineqartut tamarmik ammasumik saqqummiunneqartassasut, innuttaasut kikkut pisassiissutinik tunineqarsimanersut pillugu takunnissinnaanngortillugit.

- Aalisarneq pillugu Ataatsimiititaliarsuup inassuteqaatai sutigut tamatigut soqutiginartuupput. Inassuteqaatit atuutsinneqalertuuppata innuttaasut tamarmik assigiimmik pineqartalissapput. Pisarsimasutut oqaatigineqartut pissusissaanngitsunik iliuuseqarsimanerupput. Tamanna misissussavarput suleriaasissarlu siunissami attanneqarsinnaasoq nassaaralugu, Jens Napaattooq oqarpoq.