Professori: Gummigedinik suliaq inatsimmik avaqqutaarinninnertut isikkoqarpoq

Sermersooq suliamut, kommunip pisortani ingerlatsinermi maleruagassanik unioqqutitsisimasutut naliliiffigineqarsimasaanut, kingumut akuliunneqarpoq.

Tamatumuuna gummigedi qitiusumik inissisimaffeqarpoq, suliarlu annikitsuinnaasutut isumaqarfiginarsinnaagaluartoq, taamaattoq tunngaviulluinnarpoq kommunillu aningaasaqarnerannik aqutsinermi pingaaruteqarluni, Aalborg Universitetimi aningaasaqarnermik aqutsinermut professori, Per Nikolaj Bukh, naliliivoq.

Kommuni nammineq paasissutissiivoq, Aningaasaqarnermut Naalakkersuisoqarfimmit sanaartornermi maskiinanik qulinik – tassunga ilanngullugit gummigedinik – attartorsimanerminut uparuarneqarsimalluni, isumaqatigiissutit Naalakkersuisunut akuerisassanngortinneqaqqaarsimanngimmata.

Kommunimit paasissutissiissutigineqartut aallaavigalugit, Per Nikolaj Bukh naliliivoq, gummigedinik suliaq missingersuusiortarnermut inatsimmik avaqqutaarinninniarnertut isikkoqartoq.

Taamaattumik naalakkersuisoqarfik akuliuppoq

Maskiinap 1,2 millioner koruuninik akilerlugu pisiarinissaanut taarsiullugu kommunip qaammammut 20.338 koruuninik akiliisarluni attartorsimavaa.

- Danmarkimi kommunit ilaatigooriarlutik aamma isumassarsisarput pisinermut taarsiullugu attartoraanni pisaartoqarsinnaanerusoq, aningaasartuutit isumaginissaannut aalajangersimasunik sinaakkutissaqaraanni.

- Pissusiviusuni 1,2 millioner koruuninik aningaasartuutaasoq ukiumi ataatsimi aningaasaqarnermut 250.000 koruuniinnarnik artukkiisutut isikkoqalersinneqassanngilaq. Tamanna inatsisinik soorunami avaqqutaarineruvoq, taamaattumillu naalakkersuisoqarfik annikitsuaraannaasutut isikkoqarsinnaasumut akuliuppoq, Per Nikolaj Bukh naliliivoq.

Professori naapertorlugu, taamatut iliuuseqarnermi ajornartorsiut tassaavoq, missingersuusiortarnermut inatsimmi pisortat atuinerannik killilersimaarinninnissamik siunertamik unioqqutitsisuunera.

Akisussaassuseqartumik sipaarniarfiusumillu aamma aqutsisoqassasoq

Taassuma maluginiarpaa, sanaartornermi maskiinat katillugit qulit pineqarnerat, tamannalu kommuni suleriaasiata aaqqissuussaaneranik ilimanarsisitsisoq, kiisalu kommuni paasissutissiimasoq, gummigedi Nuummi aputaajaanissamut atugassatut attartorneqarsimasoq. Taamaalilluni piffissami aalajangersimasumi atuigallarnissaq pineqanngilaq, kisiannili maskiinamik ingerlaavartumik atuinissaq pineqarluni, taamaattumillu kommunip missingersuusiortarnermut inatsimmi sinaakkutissat iluanni pissarsiarisariaqarlugu.

Per Nikolaj Bukh erseqqissaavoq, kommuni missingersuusiortarnermut inatsisip saniatigut aamma akisussaassuseqartumik sipaarniarfiusumillu aqutsisussaatitaasoq, kommunimullu pigisanik piginnittuunermut taarsiullugu attartorneq akisunerussasoq:

- Attartorneq aqqutigalugu akisunermik pisisimagaanni tamanna sipaarniarpalaartumik aqutsinerussanngilaq.

- Nalinginnaasumik attartorneq akikinnerunngilaq, kisianni isumaqatigiissutit ataasiakkaat soorunami apeqqutaapput, Per Nikolaj Bukh oqarpoq.

Kommunaldirektøri: Qisuariarneq sakkortooq

Kommuneqarfik Sermersuumi kommunaldirektøri Ole Jakobsen naalakkersuisoqarfiup suliami qisuariarneranik eqqumiiginnippoq sakkortunerarlugulu. Tamatuma saniatigut inatsimmi annikinnerpaaffissat killissaannik aalajangersaasoqarnissaanik kaammattuivoq.

Kisianni gummigedi annikitsuinnaasariaqanngilaq, Per Nikolaj Bukh oqarpoq, erseqqissaatigalugulu inatsimmi tunngavissanik avaqqutaarinissaq taama ajornanngitsigisimappat, inatsit siunertarineqartut malillugit atorsinnaanavianngitsoq – tassalu pisortat atuinerannik killilersimaarinninnissaq.

- Inatsimmut ilaanngitsoqanngippat inatsit pitsaanerpaamik atorsinnaassaaq. Inatsisit taama ittut tamanna tunngavippiaraat. Maskiinat immikkut pingaarutillit inatsimmi ilaatinneqannginnerat imaluunniit avataaniitinneqarsinnaanerat eqqartorneqalerpat, taava aaqqissugaaneq isasuussaaq.

- Inatsit pitsaanerpaamik atuutissaaq mikisuarsunnik pingaartitsikannerluni iliuuseqartoqarpat. Tamanna kikkut tamarmik soqutigisassaraat, Per Nikolaj Bukh oqarpoq.