Puisinniarnermik akerliusut canadamiut naapissavaat
Canadamiut aallartitaat inuit sinniisuinik ilaqarlutik europami atorfilitta ullumi naapeqatigissavaat, neriuutigalugu puisinniarnermut akerliunerup annertusigaluttuinnartup annikillisarnissaa.
Angalaneq aaqqissuunneqarsimavoq canadamiut nunanut allanut niuernermullu ministeqarfiannit, ullumikkullu Bruxellesimi aallarteriarluni tallimanngorpat Haagimi naassalluni.
Aallartitat aamma tyskit naalakkersuisuisa sinniisui naapissavaat, Tyskland siusinnerusukkut oqarsimammat puisit amiinik eqqussuinerup inerteqqutaalernissaanik siuttuuniarluni, canadamiut piniariaasaata inuppalaannginnera pissutigalugu.
Holland aamma sioorasaarisimavoq puisit amiinik niuerneq inerteqqutigilerniarlugu, EU-kommissionilu pilersaaruteqarluni piniariaatsip misissorneqarnissaanik.
Canadap aalajangiusimavaa inerteqquneqarnikkut Canadap avannaani piniartut inuuniarnermi tunngaviat ajoquserneqassasoq.
Inuit Tapirit Kanadami siulittaasua Mary Simon aamma angalanermi peqataavoq, taannalu oqarpoq inuit kissaatiginngikkaat 1980-ikkunni puisinniarnerup ajoquserneqarnerujussuata nangeqqinneqarnissaa, tamatuma kingunerisimammagu puisit amiisa akiisa appariarujussuarnerat piniartullu inuuniarnermi tunngaviisa aserorneqarnerat.