Ussassaarut
Puisit amiinut tapiissutit 3,6 millioner kroninik ilaneqarput
Inatsisartuni partiit amerlanerussuteqartut puisinit amiinik tunisinermut tapiissutit 3,6 millioner kroninik ilaneqarnissaannik siunnersuut tapersersorpaat.
Siumut, Atassut, Kattusseqatigiit Partiiat aamma Inuit Ataqatigiit tapiissutit ilaneqarnissaat taperserpaat, Demokraatit kisiartaallutik partiit naalakkersuisooqatigiit siunnersuutaannut akerliusut.
Inatsisartut aningaasaqarnermut ataatsimiitsitaliaata partiit siunnersuutaat pilertortumik suliarissavaat, pissusissamisoortumik ingerlatseriaaseq atorlugu aningaasat tunniunneqarsinnaaniassammata.
Politikerit aalajangiinerisigut Great Greenlandimut puisit amiinik tuniseqqittoqarsinnaalissaaq. Suliffeqarfiup piniartuniit amernik ukiup naanissaanut pisisinnaaginnarniarluni tunisinerit apriilimi maajimilu unitsippai.
Ussassaarut
Killilersuinermut peqqutaavoq Inatsisartut 2009-mi aningaasaqarnermut inatsimmi puisit amiinik pisissutissat 26 millioner kroninut appartinneqarmata. Great Greenland ukioq kingulleq amernik 97.000-inik pisisinnaasimasoq ukioq manna amernik 67.000-iinnarnik pisisinnaanermut tapiissuteqartoqarluni.
Naalakkersuisut siullermik aningaasaliissutit 2 millioner kroninik ilaneqarnissaat siunniuteqqaarsimagaluarpaat, kisianni tassa aningaasat 3,6 millioner kroninut amerlineqarput.
IA siunnersuummut qanoq isummerumaarnersoq nalornissutigineqarsimagaluarpoq, partiit sinnerisa isumaat siumoortumik ilisimaneqareerluni.
Aningaasat Great Greenlandip piniartut maajimi nalinginnaasumik amernik tunisinerannut pisissutaasartut amerlaqatigaat, Great Greenlandip pisortaa Henrik Estrup ilisimatitsivoq.