Putinimik isornartorsiuisartoq toqusimasoq uppernarsarneqarpoq
Navalnyp sulisuisa oqaaseqartartua piumasaqarpoq Navalnyp timaa ilaqutaanut ingerlaannartumik tunniunneqassasoq.
Aleksej Navalnyj-ip sulisuisa oqaaseqartartuat uppernarsaavoq, Navalnyj toqukkut qimagussimasoq.
Taamak Navalnyj-ip sulisuisa ilaat Kira Jarmysj inuit attaveqaqatigiittarfiannut X-mut allakkatigut nalunaaruteqarpoq.
- Aleksej Navalnyj toqutaavoq. Navalnyj toqukkut qimaguppoq 16. februar toquffigisami nalunaaqutaa malillugu, nalunaarullu taanna Aleksej-ip anaanaanut pisortatigoortumik apuunneqarpoq, oqaaseqartartoq X-mi allappoq.
Oqaaseqartartorlu taanna piumasaqarpoq, Navalnyjip timaa ingerlaannartumik ilaqutaanut tunniunneqassasoq.
Paarnaarussiviup aneersuartarfiani pisutsilluni uppippoq
Ruslandimi naalagaaffiup paarnaarussiveqarfiani aqutsisoqarfimmit tallimanngornermi nalunaarutigineqarpoq Navalnyj toqukkut qimagussimasoq. Nalunaarutigineqartoq naapertorlugu napparsimalersimaneragaavoq paarnaarussiviullu aneeersuartarfiani pisuttuareerluni ilisimajunnaarsimaneragaalluni.
Russit nutaarsiassaqartitsivii Tass aamma Interfax naapertorlugit Navalnyj uummarsarniarneqarsimaneragaavoq.
- Paarnaarussiviup nakorsaasa uummarsaraluarpaat, aamma nakorsat paarnaarussiviup avataaneersut takkupput uummarsaagaluarnerlu nangillugu, uummarsaagaluarnerlu nalunaaquttap akunnerata affaa sinnerlugu iluatsinngitsumik ingerlanneqarpoq. Tamannali iluatsinngilaq, uummarsagaagaluartorlu toqukkut qimaguppoq, napparsimavimmiit nalunaarutigineragaasoq Ruslandip naalagaaffiata akilersugaa nutaarsissaqartitsivik Tass taamak ilanngutassiorpoq.
Aleksej Navalnyj-p toqqutaa suunersoq suli avammut nalunaarutigineqanngilaq.
Kira Jarmysj naapertorlugu pillakkanut paarnaarussiveqarfissuarmi Navalnyj-ip paarnaarussaaqqaffigisaani sulisut ilaat oqaluttuarsimavoq, timaa Ruslandip avannaani illoqarfimmi Salekhardimiittoq.
- Timaa paasiniaaqqissaartartunit IC-meersunit (Ruslandimi pisortatigoortumik misissuisartut ataatsimiititaliaata sulisuinit, aaqq..). Maannalu timaa "misissorpaat", Kira X-mi allappoq.
- Pimasaraarput Aleksej Navalnyj-ip timaa ingerlannaartumik kinguarsaanertaqanngitsumillu ilaqutaanut tunniunneqassasoq.
SalekHardimi toqusut inaanni suleqataasoq nutaarsiassaqartitsivimmut Reutersimut oqaluttuarpoq, Navalnyjip timaa tunniunneqarsimanngitsoq. Nutaarsiassaqartitsivik arfininngornermi ullup qeqqalersoq allappoq.
Navalnyjip anaanaa, Ljudmila Navalnaja, aammalu eqqartuussissuserisua Siberiamut paarnaarussaaqqaffigisaanut toqquianullu aallartut aamma ilisimatitsissutigineqarpoq.
Inuk qitiusumik inissisimasoq
Aleksej Navalnyj russit præsidentiannik, Vladimir Putinimik isornartorsiuinermi sivisuumik qitiusututut inissisimavoq.
2016-mi nalunaarpoq Ruslandimi præsidentimut qinersinissamut 2018-mi pisussamut sassassamaarluni. Tamannali iluatsinngitsoorpaa, sioqqullugumi eqqartuussaavoq pineqaatissinneqarlunilu politikkimik aallaavilimmik pinerluuteqarsimasutut.
2020-mi Navalnyj timmisartumi ilaatilluni perululluni napparsimalerpoq. Tysklandimi napparsimavimmut unitsinneqarlunilu misissorneqarami, paasinarsivoq toqunartumik sakkoqarluni toqoriarneqarsimasoq.
Navalnyjip toqunartumik toqoriarneqarnini anigorpaa, tamatumalu kingorna Ruslandimut uterpoq, apuutiinnarlunili aamma tigusaavoq.
August 2023-mi paarnaarussaaqqanera ukiunik 19-nik ilaneqarpoq. Tamanna sioqqullugu ukiuni aqqaneq aappaa avillugu pineqaatissinneqareernikuuvoq, paarnaarussaaqqaneralu Ruslandimi paarnaarussanut nunaqarfiliami pivoq.
2023 naalersoq Siberiami pillakkanut inissiisarfimmut nuunneqarpoq IK-3-mik taaguuteqartinneqartumut, tassaniipporu toqussi tikillugu. Paarnaarussivik taanna Ruslandimi paarnaarussiviit sakkortunersaasa ilagaat.
/ritzau/