Qaammatini qulingiluani eqqarsartoqarnerata kingorna Pele Kangerlussuaq pillugu akineqarpoq
Nunaqarfiup siunissaa pillugu apeqqummi Illersornissaqarfiup Kangerlussuarmik atuinissaa pillugu Danmarkimi naalakkersuisut isumaqatiginninniarfigineqarnerinut Naalakkersuisut innersuussipput.
Naqqiut: Allaaserisami siusinnerusukkut Ilulissani mittarfiup ammarnissaa 2025-mi naatsorsuutigineqartoq allaqqagaluarpoq. Kair.gl naapertorlugu 2024-mi ammarnissaa naatsorsuutigineqarpoq.
Nuummi Ilulissanilu aappaagu ammarnerisa kingorna, Kangerlussuaq pillugu pilersaarummik Pele Broberg (N) erseqqissaatitsiniaraluarpoq.
Qaammatit qulingiluat qaangiuttut Naalakkersuisut 1. november apeqqutit akissuteqarfigaat, naak akissuteqarnissamut piffissarititaasoq nalinginnaasumik ullunik qulinik sivisussuseqartaraluartoq.
Isumaqatiginninniarnerit ingerlapput
Akissuteqaatit sivisuumik utaqqineqarput, kisianni Naalakkersuisut erseqqissaalluanngillat. Naalakkersuisut oqarnerat naapertorlugu, Illersornissaqarfiup siunissami Kangerlussuarmik atuinissaa pillugu danskit naalakkersuisuinut suli isumaqatiginninniartoqarneranik pissuteqarpoq.
Taamaalilluni Kangerlussuarmi siunissami qanoq suliaqartoqartigissanersoq suli ilisimaneqanngilaq, siulittaasullu naalakkersuisoqarfia Air Greenlandimi sulisut pillugit ima ilisimatitsivoq:
- Nuummi Ilulissanilu mittarfiit ammarnerisa kingorna Air Greenlandi Kangerlussuarmi qassinik sulisoqarnissaani, Kangerlussuarmi siunissami qanoq suliaqartoqartigissanersoq apeqqutaassaaq. Tamanna suli ilisimaneqanngilaq.
Ingerlatsineq suliassallu ilisimaneqanngitsut
- Sulisut ataavartumik paasissutissinneqarluartarnissaasa qulakkeerneqarnissaa siunertaralugu, 2022-p ukiaaniili qaammatit pingasukkaarlugit Air Greenlandip Kangerlussuarmi sulisut ataatsimeeqatigisarpai.
AAMMA ATUARUK:Naalakkersuisut Kangerlussuaq pillugu apeqqut akinaveersaaraat
Inuiaqatigiit aningaasaqarnerannut sunniutissaanik naatsorsuinerit, Kangerlussuup ammatinneqarnissaanut aningaasartuutaasinnaasut pillugit, Pele Brobergip aamma paaserusuppai.
Kisianni taakku suli akineqarsinnaanngillat:
Sakkutuujunngitsut atuinerat qanoq annertutigissanersoq ilisimaneqanngitsoq
- Akissut: Tunngaviusunik naatsorsueqqinnerup, kingullermik 2021-mi nutarterneqartup § 37 naapertorlugu akissuteqaammut ilaatinneqarsinnaasut sinnersimavai, taamatullu maannarpiaq naatsorsueqqinnissamut ilisimaneqanngitsut amerlavallaarlutik.
- Tunngavissat ilisimaneqanngitsut siunissami inuinnaat atuinissaasa annertussusaannut, kikkut inuinnaat atuinerannik isumaginnittuunissaannut, kiisalu sakkutuut atuinissaat pillugu danskit naalagaaffiannut inaarutaasumik isumaqatigiissusiassamut tunngasuupput, attaveqaasersuutinut naalakkersuisoq Hans Peter Poulsen (S) akivoq.