Qaanaami innuttaasut peqqissusaat misissorneqassapput
Qaanaami innuttaasut peqqissusaannik misissuinissamik neqerooruteqarnissamut Danmark peqataajumalerpoq. Misissuinissaq aappaagu aallartinneqassaaq.
Kalaallit Nunaat aamma Danmark isumaqatigiissuteqarput Thulemi innuttaasut misissuiffigineqarnissaannik neqerooruteqarnissamut.
Peqqissutsimik misissuinerup Qaanaami innuttaasut ernumassutaannik qulaajaanerussaaq, innuttaasut ernumassutigimmassuk peqqissuseq 1968-ip kingorna allannguuteqarmat, allanngortoqarnera pivoq amerikamiut timmisartuat qaartartunik plutoniumitalinnik useqarluni Qaanaap ungasinngisaani nakkarnerata kingorna, Peqqinnissamut naalakkersuisoqarfik paasissutissiivoq.
Misissuinissamik aalajangerneq Kalaallit Nunaanni peqqinnissamik naalakkersuisoqarfiup Danmarkimilu Ministeriet for Sundhed og Forebyggelse suleqatigiissitaasa ataatsimiinnerisa kingorna.
Ataatsimiititaliap Thulemit aallartitaasa Peqqinnissamullu naalakkersuisoqarfiup peqqissutsimik misissuisoqarnissaanik aalajangertoqarnera nuannaarutigaat.
– Danskit naalakkersuisuinut Kalaallillu Nunaanni Namminersorlutik oqartussat - misissuineq taanna aqqutigalugu - 1968-imi ajunaartoqarnerata kingorna innuttaasut peqqissusaasa allannguuteqarsimanerat iluamik paasissallugu, nalunaarummi atuarneqarsinnaavoq.
Misissuisitsinissamut paasissutissat kingulliit 2009 naatinnagu inissereersimassapput. Misissuinissaq 2010-p ingerlanerani ingerlanneqassaaq misissuinerullu inernera 2010-mi saqqummiunneqarnissaa naatsorsuutigineqarpoq.
Innuttaasut misissuinerup inernerinik erseqqissumik paasitinneqassasut, Peqqinnissamut Naalakkersuisoqarfik paasissutissiivoq.
2003-mi misissuisoqarmat Risømit ilisimasallit oqaatigaat Qaanaap eqqaani plutoniumiminermik peqartoq. Taanan plutoniumi 1968-imi timmisartorsuup nakkarneraneersuuvoq.