Qaanaami isumaginninnikkut suliat amerlisut
Qaanaami politiit sapaatip akunnerata naanerani ulapinnerannut aalakkunnerit peqqutaapput, ilaatigut meeqqat arfinillit angajoqqaaminnit aalakoortunit nuutinneqartariaqarsimallutik.
Qaanaami politiit sapaatip akunnerata naanerani akissarsiffiusoq akileraarutiniillut utertoorfiusoq malugilluarsimavaat, angerlarsimaffinni eqqissiviilliornerit arlaliusimallutik. Pineqartuni tamani imigassaq aalakoornartulik peqqutaavoq, angerlarsimaffinnilu marlunni meeqqat angajoqqaaviniit allamut nuutinneqartariaqarsimapput.
Sisamanngornermi aggutsip 24-iani qatanngutigiit sisamat angajoqqaaviniit nuutinneqartariaqarsimappput, ulorlu taanna unnuap-qeqqalersoq aataajusup aalakoortuup ernuttani ataatsimik ukiulik angallassimavaa, taakkulu politiinnit angerlaanneqarsimapput.
Aqaguani tallimanngornermi 29-iani meeqqat allat marluk angajoqqaaviniit nuutinneqarsimapput.
Ulloq taanna unnukkut inuusuttut 13-14-inik ukiuliit arlaliullutik erngussimapput, tassungalu atatillugu imminnut atoqatigiissimallutik. Pisoqarfiusumi tassani angutip 19-inik ukiullip niviarsiaraq 13-inik ukiulik pinngutsaalillugu atoqatigeriarsimavaa, kisianni niviarsiaraq pinaassimangaarmat pinngitsaaliiniarnerigalua iluatsissimanngilaq.
- Angutip pinngitsaaleeriarneq nassuerutigaa. Tigummigallarneqarpoq, suliarlu tassunga tunngasoq suli ingerlanneqarluni. Aamma niviarsiaqqat ukiukitsut marluk 13-inik 14-inillu ukiullit atoqatigisimagamigit taakku eqqartuussaassutigissagai politeeqarfimmi pisortaagallartoq Ulrik Eriksen oqarpoq.
Pisortap oqaatigaa Qaanaami pingaartumik umiarsuaqarsimatillugu annertuumik ernguttoqartartoq.
- Pisiniarfinni imigassanik aalakoornartulinnik nioqqutissaqartillugu assut ernguttoqartarpoq, kisianni pisiassaarukkaangat eqqissisimanartaqaaq, Ulrik Eriksen oqarpoq.