Qaanaami mittarfimmut aqqut ajortoq: Aaqqiissutaagallartut saqqummiunneqarput
Qaanaap illoqarfiata mittarfiatalu akornanni aqqusernup annertuumi ajoquserneqarnerata kingorna, ornitassat taakku pingaaruteqartut akornanni aqquteqarnissaanik qulakkeerinninniarlutik oqartussat susassaqartut sukkasuumik iliuuseqarput.
Inuit, orsussaq, upalungaarsimasut il.il. illoqarfiup mittarfiullu akornanni assartorneqarsinnaaqqullugit aaqqiissutaagallartussat saqqummiunneqarlutik Ineqarnermut Attaveqaasersuutinullu Naalakkersuisoqarfik, Air Greenland A/S, Mittarfeqarfiit A/S aamma Avannaata Kommunia sisamanngormat aggustip 24-ani ataatsimeeqatigiipput. Mittarfimmut aqqutip sialummit sermimillu aattumit annertuumik ajoquserneqarnerata kingorna tamanna pivoq.
Illoqarfimmi entreprenøri suleqatigalugu aaqqiissutaagallartussat inissinneqarput, marlunnillu immikkoortoqarlutik. Ineqarnermut Attaveqaasersuutinullu Naalakkersuisoqarfik ataasinngornermi tusagassiuutinut nalunaarummi taama ilisimatitsivoq.
Immikkoortoq siulleq upernaap tungaanut atasinnaassaaq
Immikkoortoq siullermi mittarfiup illoqarfiullu akornanni ajornartoornermi aqqusiisoqarallassaaq. Sila patsisaalluni ajornartoornermi aqqusiaagallartoq isumannaarneqassaaq, timmisartumillu mittoqarnerit tamaasa iluarsaanneqartassalluni. Mittarfeqarfiit A/S ataqatigiissaareqatigilluinnarlugu tamanna najukkami entreprenørip isumagisarissavaa
Ajornartoornermi aqqusiaagallartoq massakkut biilinit firhjulstrækiusunit taamaallaat ingerlavigineqarsinnaavoq, biilinillu orsussanik assartuutinit ingerlavigineqarsinnaanani. Tamannali sapaatip akunnerata tulliani, orsussamillu illoqarfimmit mittarfimmut assartuisoqarnissaa pisariaqalersinnagu aaqqiissuteqarfigineqassasoq naatsorsuutigineqarpoq.
Mittarfiup illoqarfiullu akornanni atajuartussamik aappaagu aasaanerani aqqusiortoqarsinnaalernissaata tungaanut atasinnaasussamik, immikkoortup aappaani aqqusiortoqarallassaaq.
Nalinginnaasumik timmisartumik angalasoqarnissaa naatsorsuutigineqarpoq
Aaqqiissutaagallartussami inissitassat kingulliit, Ineqarnermut Attaveqaasersuutinullu Naalakkersuisoqarfiup najukkami entreprenøri peqatigalugu qulaajaleruttorpai. Biilit oqimaatsut aqqusiaagallartussakkoorsinnaanissaat, upernaarulu aattulernerani aqquserngup ajoqusinnginnissaa tassani pingaartinneqarpoq.
Taamaalilluni siuliani illuatungeriit naatsorsuutigaat, illoqarfimmut illoqarfimmiillu pilersaarutaasumik timmisartuussinissat ingerlanneqarsinnaassasut.
Nutaarsiassat attuumassuteqartut Ineqarnermut Attaveqaasersuutinullu Naalakkersuisoqarfiup tusagassiutinut nalunaarutigisassavai.