Qaarsuni mittarfik matussaaq
Qaarsuni ujaraaqqanik mittarfik 900 meterisut takissusilik juulip naanerani iluarsaanneqassaaq. Ilaasussat billitsisereernikut qinnuigineqarput Air Greenlandimut saaffiginneqqullugit
Qaarsuni mittarfik timmisartunut suluusalinnut matussaaq sapaammi juulip 22'annit sapaammut juulip 29'anut.
Taamak aaqqiisoqarpoq Mittarfeqarfiit mittarfimmik iluarsaassinissaat pissutigalugu.
- Mittarfiup naqqata sananeqaataa piffissap ingerlanerani allanngoriartortarpoq. Taamaattumik itinersarasaarpoq maniinakulunnertaqarlunilu. Taakkua pitsanngorsartariaqarput aasaaneranili taamaallaat suliarineqarsinnaallutik, nunap qeriunnaarnerani. Mittarfiup qaavata ilaa "qapiarneqassaaq" nalimmassarneqarlunilu, tamatuma kingorna qallerneqaqqissaaq, Niels Grosen oqarpoq taanna Mittarfeqarfinni ingerlatsinermik pisortaavoq.
Timmisartut suluusallit sapaatip akunneranut pingasut sisamat missaannik mittarput, taamaattumik Mittarfeqarfiit Air Greenlandimik qanimut suleqateqassaaq qulakkeerniarlugu Uummannap eqqaanit ilaasussat ajornartorsiorpallaannginniassammata.
Piffissami tassani Qaarsunut Qaarsuniillu angalanissamik inniminniisimaguit qinnuigineqarputit Air Greenlandimut atassuteqaqqullutit, taakkua naatsorsuutigaat timmisartuussineq qulakkeerniarlugu qulimiguullit atorneqassasut.