Qaartartorsuaq pillugu ataatsimiinnissat
Folketingip Kalaallit Nunaannut Ataatsimiititaliaata Thulemi piniartut sinniisui aammalu Thulemi sulisuusimasut qinngornernik ulorianartunik qinngortissimasut ataatsimeeqatigissavai.
Folketingip Kalaallit Nunaannut Ataatsimiititaliaata, kalaallinik Juliane Henningsenimik (Inuit Ataqatigiit) aamma Lars-Emil Johansenimik (Siumut) ilaasortaqartup sapaatip akunnerani uani 1968-imi timmisartorsuup nakkarnera sammissavaa, taamanikkut amerikarmiut sakkutuuisa timmisartuat qaartartorsuarnik brintitortunik usilluni amerikarmiut Pittuffimmi sakkutooqarfiata eqqaani nakkarmat.
Timmisartup nakkarfia radiop qinngornerinik ulorianartunik mingutsinneqarpoq, piniartullu taamanikkullu qallunaat sakkutooqarfimmi sulisut isumaqarput radiop qinngornerinik ulorianartunik qinngorfigitinneqarsimallutik, isumaqarlutillu ilamik amerlasuut tamanna toqqutigisimagaat.
Hingitaq 53-ip siuittaasua Uusaqqak Qujaukitsioq Thulemilu sulisuusimasut siulittaasuat Jens Zinglersen ataatsimiititaliamik ataatsimeeqateqassapput.
Thulemi sulisuusimasut Radiop qinngornerinik ulorianartunik qinngorfigitissimasut Peqatigiiffiata timmisartup nakkarnerani piviusut qulaajarnissaat sulissutigaa aammalu sulissutigalugu qallunaat naalagaaffiat akisussaatinneqassasoq sulisunut, taamanikkut radiop qinngornerinik ulorianartunik qinngortissimanerannut.
Sisamanngorpat peqqinnissamut ministeri Jakob Axel Nielsen ataatsimeeqatigineqassaaq, tassani peqqinnikkut kinguneqaatit oqaluuserineqassallutik.
- Aammaarluta aalajangersartinniarparput sulisunut eqqorneqarsimasunut taarsiissuteqarnissamut tunngavissaqarnersoq, aammattaarli Kalaallit Nunaannut, Lars-Emil Johansen AG-mut oqaluttuarpoq.