Qaartartumeerisoq suli qaartitseqqissamaarsimavoq
Qaartartumeerisoq suli qaartitassaminik marlunnik allakkap puuinik puulinnik pisisimavoq akunnittarfiup perusuersartarfiani qaartartuliani kiinnami saaniittup qaannginnera akunnialunnik sioqqullugu. Kinaanersoq suli paasineqanngilaq.
Qaartitassat qassiunersut saniatigut Hotel Jørgensenimi qaartartumeerisoq suli allanik allakkap puuini qaartitassanik peqarpoq, tallimanngormat akunnittarfiup perusuersartarfiani qaartartuliani saamini qaarnerani.
København Politigårdenimi tusagassiuutitigut ataatsimiinnermi marlunngornermi tamanna erserpoq, poltiit assini nutaani aamma takutissinnaallugu qaartartumeerisup kinaaneranik ilisimaneqanngitsup niaqua aqqunartitersimasoq.
- Nalunngilarput tallimanngormat perusuersartarfimmi qaartartup qaannginnerani suli allanik marlunnik pisisimasoq, politiinspektør Svend Foldager oqarpoq.
Politiinspektørip erseqqissarpaa, qaartinniagai taakku perusuersartarfimmi nassaarineqarsimasut, papæskilu qaarsimasoq aamma.
Politiinspektørilli itisilerusunngilaa najugaa allassimanersoq, allatulluunniit allakkap puuani allassimasoqarnersoq.
Aamma paasineqarpoq, angutip niuusaaatigut talerperliusukkut suli paasineqarsinnaasimanngitsoq angut kinaanersoq.
Qaartartumeerisup niuusap normua piiaqqissaarsimavaa, politiit paasisaqarfisiginnaasimanngilaat, naak innuttaasunit arlaninnit saaffigineqartarsimagaluarlutik.
Qallunaat politiivisa angutip sannaa dna inuaasalu ipaasai nunarsuarmi sumut tamaanga nassiussuuppaat, sulili maannamut tamanna kinguneqanngilaq.
Taamaalillutik ullut tallimat ingerlanerini paasiniaasartut angutip kinaasinnaaneranik paasisaqanngillat.
Svend Foldager naapertorlugu qaartartumeerisumut ilisimaneqanngitsumut suliaq politiit oqaluttuarisaanerani asseqanngilaq.
- Aatsaat taamaattumik tusagaqarpunga. Pisoq nutaarluinnaavoq, politiinspektøri marlunngornermi erseqqissaavoq.
Marlunngormat politiit pingajussaa Ørstedparken misissoqqissarpaat.
Qaartartumeerisoq qaartitsereernermi kingorna akunnerni malungajanni malugineqarani akunnittarfimiippoq, kingornalu Frømandskorpset naatsiiviup tasiani aqqartarlutik paasiniaanermi ingerlaqqiffiusinnaasunik ujaasipput.
Marluungornermi Ørstedparkenimi ujaasinerujussuaq sunik kinguneqarnersoq politiinspektørip tusagassiuutititugut katersortitsinermi oqaatigiumanngilaa.
Aamma taamatut qaartartup angissusaanut suuneranullu tunngatillugu. Belgiamiut aviisiat Het Nieuwsblad marlunngornermi allappoq, qaartartumeersisumi TATP-p amiakkuanik nassaarfigineqartoq - tassaavorlu akuutissaq mianernartoq, atortussat nalinginnaasut atorlugit pilersinneqarsinnaasoq, ilaatigut Vollsmosemi pinerliiniaqaitiginnik suliami aamma pingaaruteqartoq.
Tamanna Svend Foldagerip oqaaseqarfigerusunngilaa.
Politiit ilimagineruaat qaartartumeerisoq Danmarkimut tikikkami kisimiissimasoq.
Qanga Danmarkimut pisimanersoq ilisimaneqanngilaq, politiilli naapertorlugit tamanna ilimagisamiit siusinnerusukkut pisimassangatinneqarpoq.
Maannangaaq politiit ilimagaat tallimanngormat ualikkut siullermeertumik Hotel Jørgensenimut pisimassasoq. Maannakkulli paasineqarpoq ulloq taanna ullaakkulli nalunaaqutaq 06.30 akunnittarfimmut pisimasoq.