Qaartartumeerisoq tjejeniamiuuvoq tilluuttartoq 24-inik ukiulik

Københavns Politi "qularinngitsorujussuuvaa, Hotel Jørgensenimik qaartartumeerisoq ataasiinnarmik niulik tilluuttartutullu qingalik tassaasoq tjetjeniamiu 24-inik ukiulik Lors Doukalev.

Taamatut oqarpoq politiinspektør Svend Foldager, taassumalu pingasunngormat tusagassiortunik katersortitsinermi aviisi B.T. qutsavigaa taassuma kinaassusaanik paasinnissimaneranik Belgiami tilluuttartut klubbiinut sianeqattaarnermigut ilaasortamillu ataasiinnarmik niulimmik apersuilluni.

Qaartartumeerisup nammineq politiit malillugit "tunuartinnianngilaa" taanna kinaassuseralugu.

Belgiami politiit unnuaq naallugu Lors Doukalev-ip Liegemi ukiuni kingullerni tallimani najugaqarfigisimasaa misissuiffigisimavaat. Tilluuttartup najugaani politiit arlaannik nassaarsimanersut politiinspektørip oqaatigiumanngilaa.

Akerlianik maanna oqaatigineqarpoq akunnittarfiup perusuersartarfiani, qaartartumeerisup qaartartuliaata qaartoorfiani, politiit "sorpassuarnik" nassaarsimasut.

Marlunngormat oqaatigineqarpoq tamakkua ilaatigut tassaasut papæske allakkat puussaanik marlunnik imalik, politiilli ilisimanngilaat qaartartunik amerlasuunik allakkerivik aqqutigalugu siammarsaaniarsimanersoq.

Akerlianik Svend Foldagerip "soqutiginartorujussuartut" taavaa sivikinnerpaamik ukiut marluk matuma siornatigut 24-nik ukiullip niuusami serienormua kiliortorlugu piiarsimammagu.

- Maanna inuunera tamaat misissoqqissaassavarput, Foldager oqarpoq, aammalu angutip ikinngutai, angalasarneri upperisaalu misissorniarpai.

Belgiamiu tilluuttartunik sungiusaasoq qaartartumeerisumik ilisarinnittoq malillugu angut muslimiuvoq uppertoq.

Tusagassiortunik katersortitsinermi tamatuma saniatigut oqaatigineqarpoq Lors Doukalev Københavnimiinnermini aaqqatinik plastikkinik pisisimasoq.

Tamanna paasineqarpoq innuttaasunit assigiinngitsunit 253-nit saaffigineqranikkut, tamakkua tallimanngormalli qaartartup qaartoorneraniilli takusaminnik politiinut nalunaaruteqaqattaartarsimammata.