Soraarsiortornissaq suli oqallisigaat
Qaasuitsup Kommunia 23 mio. kr.-nik sipaassaaq
Qaasuitsup Kommuniani ingerlatsiviit tamarmik peqquneqarput sipaarniutissanik nassaarniaqqullugit. Soraarsitsinissaq suli oqallissaavoq
Ukiap ingerlanerani Qaasuitsup Kommuniani sipaarutissat 23 millioner koruunit nassaarineqartussanngorput. Sulisut 80-it soraarsinnissaat kommunalbestyrelsep itigartitsissutigaa. Qullersat akornanni sipaarniutissat nassaarineqarsinnaasut IA isumaqarpoq.
Atuaruk: Qaasuitsup Kommuniani soraarsiortornissamut ernumapput
- Sapinngisamik soraarsitsinaversaarnikkut sipaarniutissanik nassaarniassaagut. Tamanna ilaatigut pisinnaavoq sulisut soraarneranni atorfinni inuttaleeqqinnani suliat nutaamik agguaateqqinnerisigut, Qaasuitsup Kommuniani borgmesteri Ole Dorph Siumumeersoq Sermitsiaq.AG-mut oqarpoq.
Marlunnik oqallit
Kommunalbestyrelse aggustip arfineq pingajuani ataatsimiippoq tassanilu ataatsimiititaliat ingerlatsiviillu tamarmik suliakkinneqarput katillugit 23 millioner koruuninik sipaarniuteqaqqullugit.
- Qullersaqarfik aningaasarpassuarnik pilersaarutaangitsunik atuiffiuvoq sippuiffiullunilu tamanna piartumik iluarsisariaqarpoq qullersaqarfiup avataaniittut kisiisa akiginagit qullersaqarfimmili aningaasartuutikillisaanikkut tamanna anguneqatariaqarpoq, kommunalbestyrelsemi Inuit Ataqatigiit sinnerlugit Ane Hansen oqarpoq.
Isornartorsiuineralli tunngavissaqarsorineqanngilaq.
- Sipaarniarnissami siullermik saqqummiussaqarsimagaluarpugut kommuni tamakkerlugu sulisut 80-it soraarsinneqarnissaannik imaqartumik. Tamannali kommunalbestyrelsep Inuit Ataqatigiit peqataaffigisaannik tunuartinneqarpoq. Taamaammat Inuit Ataqatigiit maanna piumasartik attatiinnarniarunikku marlunnik oqaqarlutik oqalupput, Ole Dorph oqarpoq.
Kommunalbestyrelse tullianik ileqquusumik ataatsimiissaaq oktoberip qulingani tassanilu ataatsimiititaliat ingerlatsiviillu sipaarniutissanik siunnersuutitik saqqummiutissavaat.
- Suliaq qanoq isikkoqarluni naammassiumaarnersoq suli naluarput. Kisianni sipaarniutissanik nassaarniarnissami qullersaqarfik mininneqartussaanngilaq, Ole Dorph oqarpoq.