Qaleralinniarsinnaanermut akuersissutit pillugit Palle Jerimiassen puffassimaartoq
Aqutsiveqarfik 47-mi aalisartut aqutsiveqarfik 46-mut qaleralinniarsinnaanermut akuersissummik tunineqarsinnaannginnerat, aalisartunik immikkoortitsinerusoq, Avannaata Kommuniani borgmesteri isumaqarpoq. Akuersissutinik suliaqartarneq kipiluttunartoq aalisariutaatilik oqarpoq, borgmesterilu tunngavissaqarpianngitsumik ernumasoq KNAPK isumaqarpoq
- Avannaani aqutsiveqarfimmi 47-mi Upernavimmi, Uummannami Qeqertarsuullu Tunuani, qaleralinnianik immikkoortitsineq unitsinneqarluinnartariaqarpoq.
Taama ersaritsigisumik Avannaata Kommuniani borgmesteri Palle Jerimiassen, Siumut, naalakkersuisunut piumasaqarpoq. Aqutsiveqarfik 47-mi qaleralittassanik pisassiisoqartarpoq, aqutsiveqarfik 46-milu, tassa Qeqertarsuup Tunuata kujataatungaaniit Kalaallit Nunaata sinneranut, killilersugaanngitsumik qaleralinniartoqarsinnaavoq, aaliangersimasumillu pisassiisoqarneq ajorluni.
Akuersissutit pillugit nalunaarut 2016-imeertoq naapertorlugu, umiatsiaararsortoq, 6 meterit ataallugit angissusilimmik angallateqartoq, aqutsiveqarfik 47 qaleralinniarsinnaanermut akuersissutaateqartoq, aqutsiveqarfik 47-mi aalisarsinnaanermut akuersissummik tunineqarsinnaanngilaq. Taamatuttaarlu aqutsiveqarfik 46-mi umiatsiaararsortoq, aqutsiveqarfik 47-mi aalisarnissamut akuersissummik tunineqarsinnaanani.
Paasiuminaatsinneqartoq
Tamatumani aqutsiveqarfik 47-mi aalisarfioreeqisumi annertuallaamik aalisartoqannginnissaa anguniarneqarpoq.
Akerlianilli angallatit 6 meteriniit anginerusut, aqutsiveqarfik 46-milu angerlarsimaffeqartut, aqutsiveqarfik 47-mi angallatit qaleralinnik pisassaataannik pisisinnaapput, taamaalillutik aqutsiveqarfinni taakkunani marlunni qaleralinniarsinnaallutik. Borgmester Palle Jerimiassenili naapertorlugu, aalisartut aqutsiveqarfik 47-miittut, 46-mi aalisarnissamut akuersissummik tunineqarsinananngillat, tamannalu immikkoortitsinertut taasariaqarsoraa. KNAPK-lli siulittaasuata oqarnera naapertorlugu, aalisariuteqarpoq aqutsiveqarfik 47-mi angerlarsimaffeqartunik, aqutsiveqarfik 46-milu qaleralinniarsinnaanermut akuersissummik tunineqarsimasunik. Taamaattumillu borgmester Palle Jerimiassenip immikkoortitsineraanera tunngavissaqarpallaanngitsoq, Henrik Sandgreen isumaqarpoq.
Allaaserineqartoq Sermitsiami tamakkiisumik atuaruk. Aviisi uani pisiarineqarsinnaavoq: