Qaleralittassat amerlipput
Upernavik aamma Uummannaq tamarmik 500 tonsinik pisassinneqaqqipput.
Aalisartut Upernavimmi Uummannamilu aalisaqqilersinnaapput qaleralinniutinik saliineq aallartissimasoq uppernarsaatissaqalerpat KNR allappoq.
– Diskobugtimi, Uummannami Upernavimmilu immap naqqaniit qaleralinniutit qallorneqarnerinut uppernarsaatissaqalerpat naalakkersuisut pisinnaatippaannga Upernavimmi Uummannamilu immikkut qaleralittasseeqqinnissamut, naalakkersuisunut ilaasortaq Ane Hansen oqarpoq.
Ane Hansenip erseqqissaatigaa pisasseeqqinneq immikkut illuinnartumik ukioq mannaannaq tunniunneqartoq. Tassa nunaput aalisagaarniassaguni, uppernarsartussaavaa ilumut piujuartitsinissaq anguniarlugu suliniuteqartuulluni. Taamaanngippammi nunarput aalisagaarniarsinnaajunnaartussaavoq nunarsuup sinneranut, Ane Hansen oqarpoq.
– Uppernarsaatinik takussutissiisoqanngippat Kalaallit Nunaat nunarsuup sinneranut aalisakkanik tunisisinnaajunnaassaaq. Upernaviup eqqaani Kuulteqarfimmik taaneqartartumi saliinissaq pisariaqarnerpaavoq, Ane Hansen oqarpoq.