Qalerallit milligaluttuinnarput
Qalerallit Nuummut tulaanneqartartut agguaqatigiissillugu angissusaat 2010-mi 56 cm-init 2017 aamma 2018-imi 48 cm-inut milleriarsimapput. Tassa imaappoq 1,5 kiloniit 900 gramit missaanut oqileriarsimapput.
Qaleralliup mikinerulerlunilu oqinnerulerneranut aalisarneqarpallaarnera pissutaagunartoq, IA-mi politikerip, Sofia Geislerip paragraf 37 atorlugu apeqquteqaataanut Aalisarnermut Naalakkersuisoq, Nikkulaat Jeremiassen, akissummini ilisimatitsivoq.
Ukiuni arlalinni pisarineqartartut amerlassusaat ilanngunneqarsimapput.
Nuup eqqaani qaleralinniarneq
– ukiumut agguaqatigiissillugu pisarineqartartut piffissani ukunani
1960-imiit 1988-imut: 405 tons
1989-imiit 2009-mut: 50 tons
2010-miit 2018-imut: 810 tons
Ukiuni tallimani kingullerni qaleralinnik tulaassisoqarnerulersimavoq.
2013-imiit 2018-imut: 1.100 tons
Suliniutit aallartinneqarput
Nikkulaat Jeremiassenip nassuerutigaa taamaaginnartoqarsinnaanngitsoq, aalisarneq maannatut ingerlanneqartoq piujuaannarnissamik tunngaveqanngimmat.
- Sumiiffimmi pineqartumi qaleralinniarnerup illersorneqarsinnaasumik annertussuseqalernissaa Naalakkersuisunit sulissutigalugu aallartinneqareerpoq. Aqutsiveqarfimmik nutaamik pilersitsinikkut Nuup kangerluani qaleralinniarneq aaqqiiffiginiarneqassaaq. Aalisarnerup siunissami piujuaannartitsineq tunngavigalugu ingerlanneqarnissaa suliniutit aqqutigalugit qulakkeerniarneqassaaq, Nikkulaat Jeremiassen ilisimatitsivoq.