Qalerallit: Naalakkersuisut pisassiissutit 1.000 tonsinik apparpaat
Aqutsiveqarfiit tallimat nutaat atulernerinik nalunaaruteqarnerup kingorna, aqutsiveqarfinnut tamanut sinerissap qanittuani qaleralinniarnermi qaleralinnik pisassiissutinik Naalakkersuisut aalajangersaapput.
Ukiuni arlalinni suliarineqarnerata kingorna, kitaata sineriaani tamani sinerissap qanittuani qaleralinniarfinnut aqutsiveqarfinnik atuutilersitsisoqarpoq aamma pisassiiviunngitsut atorunnaarsinneqarlutik.
Aqutsiveqarfinnut nutaanut aappaagumut pisassiissutit aalajangerneqarput, sumiiffinnilu arlalinni biologit innersuussutaat qaangerneqarput, taamatuttaarlu aqutsisoqarfinni pioreersuni Qeqertarsuup Tunuani, Uummannami Upernavimmilu aamma taamaappoq.
Aappaagumut pisassiissutit aqutsiveqarfinni taakkunani pingasuni ukioq mannami 1.000 tonsinik appasinnerussasut, Naalakkersuisut tallimanngornermi nalunaarutigaat, biologit innersuussutaat naapertorlugu TAC-ip katinnerata nungusaataanngitsumut appartinnissaanut pilersaarummut ilaatillugu.
2021-mut pisassiissutit. Siunnersuinerit ungalulerneqarput:
Kvoter for 2021. Rådgivning i parentes:
Qeqertarsuup Tunuani: 7.847 tons (4.346)
Uummannaq: 9.167 tons (5.153)
Upernavik: 8.134 tons. (5.068)
Aqutsiveqarfiit nutaat
Nuummi pisassiissutit 1.039 tonsinut inissinneqarput, naak siorna 834 tonsiinnaat pisarineqaraluartut, Sisimiut-Maniitsumi pisassiissutit 2019-imi pisarineqartunit appasinnerusumut inissinneqarlutik. Paamiut-Qaqortumi 450 tonsinik tunisisoqarpoq, tassanilu ukioq mannamit appasinnerusumik inissiisoqarpoq.
Aqutsiveqarfinni nutaani pisassiissutit. Siunnersuinerit ungaloqarput.
Sisimiut-Maniitsoq: 223 tons (300 tons qaangissanngilaat)
Nuuk: 1.039 tons (ukiuni pingasuni 398 tonsinik appariassapput)
Paamiut-Qaqortoq: 618 tons (ukiuni pingasuni 222 tonsinik appassapput)
Qaanaaq: 500 tons (siunnersuisoqanngilaq)
Tunumi: pisassiisoqanngilaq
Aqutsiveqarfimmi Qaanaamut siunnersuisoqanngilaq, tassani 500 tonsinik pisassiisoqarpoq. Agguaqatigiissillugu pisat procentinik qulinik ilaneqartut, Namminersorlutik Oqartussat ilisimatitsipput. Kisianni Pinngortitaleriffimmit kisitsisit naapertorlugit ukiuni tallimani kingullerni pisat 150 aamma 250 tonsit akornanniissimapput.
Aqutsiveqarfinni nutaani pisassiissutit 2022-p kingorna ukiut pingasut ingerlanerini nungusaataanngitsumut tulluarsarneqassasut Namminersorlutik Oqartussanit nalunaarutigineqarpoq.