Qalerallit: Pisassiissutit piujuartitsisut isumaqatiginninniutigineqarput
Naalakkersuisoq piujuartitsisumik aalisartoqarnissaanik neriorsuivoq, aalisarnermut pilersaarutit aalajangersimaasut pillugit oqaaseqannginnermini, aalisarnermut ataatsimiititaliarsuaq TAC-millu aalajangersaanissaq utaqqeqqaarpai.
Naalakkersuisoq piujuartitsisumik aalisartoqarnissaanik neriorsuivoq, aalisarnermut pilersaarutit aalajangersimaasut pillugit oqaaseqannginnermini, aalisarnermut ataatsimiititaliarsuaq TAC-millu aalajangersaanissaq utaqqeqqaarpai.
Qeqertarsuup Tunuani, Uummannami Upernavimmilu sinerissap qanittuani qaleralinniarnerup aqunneqarnera ukiuni arlalinni sakkortuumik oqallisigineqartarpoq.
Ukiuni kingullerni nalunaarusiat uppernarsarpaat, biologit siunnersuinerannit qaffasinnerujussuarmik pisassiissutinut akuersissutillit amerlavallaartunut paggatassiilluni aalisarneq iliuuseqarfigineqanngippat, aalisarneq ajalusooratarsinnaasoq.
Upernavimmi Qeqertarsuullu Tunuani sinerissap qanittuani qaleralittassat ukiup naalernerani pisassat juunimut juulimullu nuunneqartut, Naalakkersuisut sapaatip-akunnterata siuliani nalunaarutigaat, kiisalu siorna aalisarnermit angallatinit 6 meterinit anginerusunut pisassat umiatsiaaqqanut 6 meterinit minnerusunut nuunneqarnissaat naatsorsuutigineqartoq.
Aalisarnermut Ataatsimiititaliarsuaq utaqqigaa
Naalakkersuisut aalisarnermut tunngatillugu siunissamut qanoq pilersaaruteqarnersut, Piniarnermut Aalisarnermullu Naalakkersuisumit Sermitsiaq.AG-p tusarusussimavaa.
- Aalisarnermut Ataatsimiititaliarsuup isumaliutissiissutaa Naalakkersuisut utaqqivaat, tamatumalu kingorna aalisarnermi illuatungeriit Inatsisartunilu partiit suleqatigalugit, qanoq ataatsimoorluta piujuartitsisumik Nunatsinni aalisarneq qulakkiissanerlugu suliarissavarput, Aqqaluaq B. Egede allagaqarluni akissuteqarpoq.
Naalakkersuisuusimasut pisassiissutit ukiuni sisamani appariartortinneqarnissaat pilersaaruteqaraluarput, taamaalilluni biologit siunnersuinerannut tulluarsarneqassammat. Pilersaarummut tassunga ilanngullugu avannaani sinerissap qanittuani 2021-mi pisassiissutit Siumup naalakkersuisoqatigiivi 2020-mut sanilliullugu 1.000 tonsinik appasinnerusumik inissiipput.
TAC siunnersuinermit 82 procentinik qaffasinnerusoq
Tamatuma peqatigisaanik sumiiffiit pisassiiviunngitsut atorunnaarsinneqarput, kitaatalu sineriaani tamani aqutsiveqarfiit atuutilersinneqarput, kangianilu sumiiffimmi ataatsimi pisassiiviunngitsoqarpoq.
Siorna sinerissap qanittuani aalisarnermut TAC-ip katinnerat biologit siunnersuutaannit 82 procentinimik qaffasinneruvoq. Siunissami qanoq isikkoqassanersoq suli paasinarsinngilaq.
- Naalakkersuisut ilisimatuussutsikkut siunnersuut Naalakkersuisut pissarsiareqqammerpaat. Taamaammt qaammatini tulliuttuni aalisarnermi illuatungeriit TAC-ip aalajagersarneqarneranut suleqatiginiarpakka, Aqqaluaq B. Egede oqarpoq.
Aalisarneq qanoq piujuartitsinermik siunertaqassanersoq, Piniarnermut Aalisarnermullu Naalakkersuisup akissummini itinerusumik oqaaseqarfiginianngilaa.
- TAC-ip aalajangersarneqarneranik sulineq ingerlatillugu Aalisarnermut Piniarnermut Naalakkersuisoq allamik ilanngussassaqanngilaq, taama akissuteqarpoq.
2021-mi pisassiissutit. Siunnersuineq ungalulikkami:
Qeqertarsuup Tunua: 7.847 tonsit (4.346)
Uummannaq: 9.167 tonsit (5.153)
Upernavik: 8.134 tonsit. (5.068)
ICES-imi aamma NAFO-mit 2022-mut siunnersuut ukioq mannatut ippoq, Pinngortitaleriffik juunip 15-ianni nalunaarummi taama ilisimatitsivoq.