Qallunaaq imaani ujajaasutut Ruslandimi unnerluutigineqarpoq

Qallunaaq Greenpeace-mut ilaasortaq Anne Mie Roer Jensen Ruslandimi pisortanit imaani ujajaasutut unnerluutigineqarpoq, taamatut avatangiisinik illersuiniaqatigiiffik Twitter-imi allappoq.
Paasissutissiissut tamanna aamma Danmarkimi Greenpeace-p immikkoortoqarfianit uppernarsarneqarpoq.
Taamatut unnerluunneqarpoq russit oqartussaasuisa Greenpeace-mi ilaasortat allat 14-it ippassaammat unnerluutereeraallu.
Greenpeacemit akerliuniat katillugit 30-t russit oqartussaasuinit tigummineqarallarput, uliasioqatigiiffiup Gazprom-ip Det Arktiske Hav-imi qillerivianik tiguaariaraluartutut. Kingorna Greenpeacep umiarsuaa russit sinerissamik alapernaarsuisuinit ikiffigineqarpoq Murmansk-iliaanneqarlunilu.
Imaani ujajaaneq Ruslandimi ukiut 15-it angullugit parnaarussaassutaasinnaavoq.
Imaani ujajaasutut pasillerneqarneq Greenpeacep sakkortuumik akerlilersimavaa.
Anne Mie Roer Jensen 26-nik ukioqarpoq. Taanna Greenpeacep umiarsuaani Arctic Sunrise-mi, russit uuliamik qillerinerannik akerliuniarluni Det Arktiske Hav-imukarsimasumi, aquttut pingajoraat.
Taanna Marstal Navigationsskole-mi umiarsuarmi naalaganngorniarpoq.
Akerliuniat 30-t septembarip 19-ianmni imaani tigusarineqarput kingornalu parnaarunneqarlutik.
Præsident Vladimir Putin kingorna oqarsimavoq Greenpeacep akerliuniarnera imaani ujajaaniarnertut isiginagu.