Qallunaat naalakkersuisuisa nunarput pissaanilerngusaassutigaat
Berlingske naapertorlugu ministeriunerup Helle Thorning-Schmidtip nunanut allanut ministerip Villy Søvndalip qallunaat suliffeqarfiinik nunatsinni aatsitassarsiornikkut aningaasaleeqqusiniarnera unitsinniarsimavaa
Nunatsinni aatsitassat pillugit qallunaat pissaanilerngusaannerat naalakkersuisut akornanni ilungersunarsiartorpoq.
Aviisi Berlingske naapertorlugu ministeriunerup Helle Thorning-Schmidtip Socialdemokratineersup nunanut allanut ministeri Villy Søvndal SF-imeersoq nunarput pillugu ataatsimiinnermi pingaarutilimmi peqataanissaa unitsinniarsimavaa.
Berlingskemi paasisat naapertorlugit Søvndal ministeriuneqarfimmiit qinnuigineqarpoq ataatsimiinnermi peqataaqqunagu, suliffeqarfissuarmi MT Højgaardimi ingeniørinilu siunnersuisartuni Orbiconimi aqutsitsisut nunanut allanut ministeri naalakkersuisullu siulittaasuat Kuupik Kleist Inuit Ataqatigiinneersoq isumasioqatigiinnissamut qaaqqoreeraallu eqqartueqatiginiarlugit qanoq ilillutik assersuutigalugu soraarnerussutisiaqarnermi aningaasaateqarfiit Danmarkimiittut nunanit allanit aatsitassarsiornikkut suliffeqartissuit suleqatigalugit Kalaallit Nunaanni aatsitassarsiornikkut aningaasaleeqatigisinnaaneraat.
Ministeriuneq akornusiivoq
Helle Thorning-Schmidtip ministereqarfia Berlingskep paasisai naapertorlugit Villy Søvndalip qallunaat inuussutissarsiortut soraarnerussutisiaqarnermullu aningaasaateqarfiit nunatsinni aningaasaliiinissaat qanoq aqqutissiuunneqarsinnaanersut pillugu ataatsimeersuarnermi peqataanissaa akornusersimavaa.
Berlingskep paasisai naapertorlugit ministeriuneqarfimmit nunanut allanut ministeri erseqqissaavigineqarsimavoq ataatsimiinnermi Københavnimi sumiiffiit ilaanni pisussami peqataassanngitsoq. MT Højgaard aamma Orbicon aalajangerput ataatsimiinnissaq taamaatinniarlugu ataatsimeersuarnissarlu novembarip naanerani pisussaagaluaq januaarip aallartinneranut kinguartillugu.