Qallunaat nunatsinnitut ukiortalernissaa naatsorsuutigisinnaavaat
Issittumi sikuallaartarunnaarnera peqqutigalugu Danmarkimi ukiuuneri issinnerulernissaat naatsorsuutigisariaqarpoq, ilisimatooq isumaqarpoq.
Danmarkimi ukiuunera issingaatsiarsimavoq, Nunatsinni Issittullu sinnerani immikkut kiannerungaatsiarluni.
Danmarkimi Europallu nunaasa sinnerani siunissami taamaattaleriaannaavoq. Amerikamiut Colorado-mi nittaattarneranik sikusarnanillu paasiniaasarfiup, NSIDC, paasissutissaatai nutaat taama ersersitsipput, Politiken allappoq.
Paasiniaasarfik1979-imili Issittumi sikusarneranik nakkutilliisalersimavoq, oktober 2010-imiillu januar 2011-mut aatsaat taama sikoqanngitsigisoq paasineqarpoq.
Februarimi sikoqassusia 2005-imit annikinnerpaaffia angusimavaa, NSIDC-milu pisortaq Mark Serreze erseqqissaavoq, immami sikukinnerata issittumi silaannaap kaaviaariaasianik allanngortitsisinnaasoq.
Silaannaap naqitsinerunerata kingunerissavaa Qalalersuarni anorrit kissarnerulernissaat, issittullu naqitsinera nillertoq Europamut siaruariartussaaq. 2009-10 aamma 2010-11-mi ukiuunerisa taama nillertiginerinut tamanna nassuiaassutigaa.
Tysklandimi Postdan Institut-imi qarasaasiakkut najoqqutassat silaannarmik ilisimatuut suliaasa Europap Avannaani Qeqqanilu ukiuuneri issittut Issittullu imarpiini - pingaartumik Skandinaviap avannaatungaani Barentshavet-imi - sikoqannginnerunerata attuumassuteqarnerat uppernarsarpaat.
Taama isummerneq qallunaat silaannaq pillugu ilisimatuut nunanit tamanit tusaamaneqartut taperserpaat, tassaasut Danmarks Klimacenterimit ilisimatusarnermut pisortaq Jens Hesselbjerg, USA-mi Los Alamos National Laboratory-mit Sebastian H. Mernild aamma DMI-meersoq Martin Stendel.
- Danmarkimi aamma Europap avannamut kitaata sinnerani ukiuunerani issinnerunera issittup anoriinit avannaaneersunit peqquteqarnerupput. Ukiunilu makkunani anorit nillernerusut amerlanusut misigisarpagut Jens Hesselbjerg Politikenimut oqarpoq.
Qallunaat ilisimatuuisa isumaqatigaat sikukinnerusarnera pingaaruteqartutut peqqutaasoq.