Qallunaatoorsinnaannginneq pissutigalugu angusinngitsoortartut
Karl Lyberthip paaserusuppaa qaqugukkut kalaallit oqaasii atorlugit soraarummeertoqarsinnaanersoq
Inatsisartuni Siumut sinnerlugu ilaasortap Karl Lyberthip maanna naalakkersuisunut apeqqutigaa qaqugu kalaallisut oqaasillit kalaallit oqaasii atorlugit soraarummeertalersinnaanersut.
Pineqarput peqqinnissamik ikiortit imaluunniit peqqinnissaqarfimmi ikiortit piginnaanngorsaqqinniarlutik ilinniaqqinniartut tarnikkut innarluutillit sullittalernissaat anguniarlugu.
Suleqataasut arlaqartut tarnikkut nappaatilinnut immikkoortortaqarfimmi sulisalerusuttut misilitsinnerminni angusinngitsoorput danskit oqaasiinik pisinnaasaat amigaateqarmata, taamatut Karl Lyberth ilisimatitsivoq.
Karl Lyberth isumaqarpoq ajuusaarnartuusoq peqqinnissaqarfimmi suleqataasussat piginnaanillit tarnikkut innarluutilinnik sullitaqarusuttut danskisut soraarummeernermi angusinngitsoornerat pissutigalugu taamatut suliaqarsinnaannginnerat.
- Piaarnerpaamik tamanna aaqqiiffigineqartariaqarpoq, Karl Lyberth tikkuaavoq, aamma paaserusuppaa qaqugu kalaallit oqaasii atorlugit misilitsittalertoqassanersoq.
- Tarnikkut innarluutillit kalaallisut oqaluttuupput, taakkulu pisariaqartippaat kalaallisut oqaluttunit passunneqarnissaq.
Naalakkersuisunut makku apeqqutigai:
1. Peqqinnissamik ikiortit imaluunniit peqqinnissaqarfimmi ikiortit tarnikkut innarluutillit sullittalernissaat anguniarlugu piginnaanngorsaqqinniarlutik ilinniaqqikkusuttut qallunaat oqaasii kisiisa atorlugit soraarummeersinneqarsinnaanerannut suut tunngaviuppat?
2. Peqqinnissamik ikiortit imaluunniit peqqinnissaqarfimmi ikiortit tarnikkut innarluutilinnut immikkoortortaqarfimmi sulilerusuttut soraarummeernermi qassit angusinngitsoortarpat?
3. Misissuiffigineqarsimava qassit danskit oqaasiinik pisinnaasaat amigaateqarnerat pissutaalluni angusinngitsoortarnersut?