Qaqortoq: Pinngortitami Qaqortup eqqaani ikuallattoq qaminneqarpoq
Ilisimaneqanngikkaluartoq qanoq ililluni pinngortitami ikuallattoqalersimanersoq, ikuallattoqartillugu qatserinermi aqutsisoq Karl Larsen aammalu upalungaarsimanermi pisortap tullia Otto Kielsen kaammattuipput pinngortitamiitilluni innermik atuineq mianersuunneqartariaqartoq.
Suli ilisimaneqanngilaq Qaqortup avannaata kitaatungaani ikuallanneq qanoq ililluni pinngorsimanersoq.
Qaqortumi qatserisartut Qaqortup eqqaani ikuallannermik qamiterinerup ingerlasimanera pillugu nalilersuileruttortut Sermitsiaq.AG-mit iluatsillugu oqaloqatigivagut.
Arsaattarfiit qulit 15-illu akornannitut annertussuseqarpoq
Ikuallattoqartillugu qatserinermi aqutsisup Karl Larsen Qaqortumi qatserisartoqarfimmiit qatserineq aquppaa, upalungaarsimanermullu pisortap tullersortaa Otto Kielsen ikuallattumi qatserisunik aqutseqataalluni. Taakku oqaluttuarput ikuallattoq arfininngornermi ualikkut kingusissukkut qatserinerup kingorna qatserisartut qamissinnaasimagaat.
- Nalilerparput ikuallaffik arsaattarfiit qulit 15-illu akornannitut annertussuseqartoq. Naluarput ikuallanneq qanoq pinngorsimanersoq, taamaattorli pissutissaqarpoq ilimagissallugu arlaat innermik pinngortitami atuinermini mianersuaalliorsimasinnaasoq, Otto Kielsen oqarpoq nangillunilu:
- Nuna ikuallaffiup nalaaniittoq panertorujussuuvoq, taamaammallu ikuallattoq siammapallassimalluni, pisoq tunngavigalugu innuttaasunut kaammattuutigissavarput ikuallannermik aallartitsissutaasinnaasut atorneqartillugit mianersorluinnartoqassasoq, assersuutigiinnarlugu killuutigut igaasarsimagaanni imaluunniit pujortarsimagaanni mianersortoqartariaqarpoq. Ikumaartitsisimagaanni ikumaartitsiffik ikuallannermik aallartitsisinnaasumiinnginnissaa aammalu ikumaartitsiviup qimannginnerani qameqqissaarsimanersoq isumannaaqqaarneqassasoq kaammattuutigissavarput, aammalu cigaretsimik pujortartartunut sakkortuumik kaammattuutigissavarput qamitakut pinngortitamut iginneqartasssanngilluinnartut, Kielsen kaammattuivoq.
Narsami qatserisartut ikiuupput
- Arfininngornermi ullup qeqqa qaangilaaraa anorsaarnerata kingunerisaanik ikuallanneq sakkortuseqqippoq. Taamaattorli ikuallattup tasersuup qanittuaniinnera iluaqutigalugu pooqattaq imermik immertagaq (Bambi-bucket-imik taaneqartartoq, aaqq.) helikopterimiillu qamiterussutaasartoq 1.000 literimik imaqarsinnaasoq atorlugu helikopterimit qamiterisitsisinnaasimavugut, taamaalilluni nunamiit aammalu silaannarmiit qamiterineq ingerlanneqarsinnaasimalluni, taamaammallu pilertortumik qamiterineq ingerlanneqarsinnaasimalluni, ikuallattoqartillugu qamiterinermik aqutsisoq Karl Larsen oqaluttuarpoq.
Taamaattorli pinngortitami ikuallanneq arsaattarfiit qulit 15-illu akornannittut annertussusilik annertujaarpoq. Karl Larsen tassunga tunngatillugu oqaluttuarpoq Narsami qatserisartut ikiuukkiartorsimasut.
- Qamiterineq ajunngitsumik ingerlasinnaasimavoq, tassami uagut nammineq qatserisartutta saniatigut aamma Narsami qatserisartut inunnik pingasunik pupmpinik atortussaminnillu allanik nassartunik ikuallaffimmukartitsillutik ikiuupput, tamannalu assut qujanarpoq, ikuallattoqartillugu qatserinermut aqutsisoq Karl Larsen oqaluttuarpoq.
Nunaminertaq ikuallattoq atorneqanngilaq
Kalaallit Nunaata Kujataata immikkuullarissumik ilisarnaatigaa nunaminertat annertoorujussuit nunalerinermut uumasuuteqarnermullu atorneqaramik, pingaartumik savaatilinnit aammalumi nunalerinermik suliaqartunit allanit. Taamaattorli ikuallaffiusorpiaq qujanartumik atorneqanngilaq, Karl Larsen oqaluttuarpoq:
- Qujanaqaaq nunaminertaq ikuallattoq nunalerinermik inuussutissarsiuteqartunit atorneqanngimmat, taamaammallu sumiiffimmi illuuteqartoqaranilu uumasuutinik sumiiffimmi angalasoqanngilaq, taamaassimagaluarpammi pinngortitamik qamiteriniarnermi pissutsit allarujussuusimassagaluarput, ikuallattoqartillugu qatserinermi pisortaq oqarpoq.
Nunaminertaq ikuallaffiusimasoq nakkutigineqarallassaaq
Ikuallattoq qaminneqareeraluartoq, taamaattoq isinik takuneqarsinnaanngitsumik nunap iluani suli aamaartoqarsinnaavoq, taamaammallu ikuallaffiusumi Qaqortumi qatserisartut qatserinerat suli naammassivinngilaq, nakkutigineqassagamimi. Taamaammat Karl Larsen ikuallaffiusimasumukaliivissoq Sermtisiaq.AG-mit iluatsillugu oqaloqatigaarput:
- Qulakkeertussaavarput ilumut inneq tamarmi qaminneqarsimasoq, taamaammallu nunaminertaq ikuallaffiusimasoq nakkutigeqqaassavarput, aatsaallu qularnaatsumik naqissusersinnaanngorutsigu ilumut tamarmi qaminneqartoq, taava suliarput naammassisimallugu oqarsinnaanngussaagut, taamaammat ikuallaffik ornillugu kingumut misissoqqissaariartulerparput, ikuallattoqartillugu qatserinermi aqutsisoq Karl Larsen, Qaqortumi qatserisartoqarfimmeersoq oqarpoq.