Qaqortumi pingasut aamma tunillatsissimapput
Inuit 250-it missaanniittut tallimanngormat juulip qulingiluaani Qaqortumiittumi Rockhousemi tusarnaartitsisoqarnerani najuussimapput. Tunillatsissimasoq ataaseq peqataasimavoq, maannalu inuit allat pingasut aamma coronamik tunillatsissimallutik. Tusarnaariarsimasut tamarmik misissortissapput.
Tallimanngormat juulip qulingiluaani Tomba Qaqortumiittumi Rockhousemi tusarnaartitsimmat peqataasimasugit angerlarsimaannassaatit, piaarnerpaamillu Coronavirusimik tunillatsissimanerlutit misissortissallutit.
Coronavirusimik tunillatsissimannguatsiartoq Qaqortumi tusarnaartitsisoqarnerani peqataasimammat Namminersorlutik Oqartussanit taamatut kaammattuisoqarpoq.
Tunillatsissimasinnaasunik ujaasinermi paasineqarpoq inuk tunillatsissimasoq ataaseq tusarnaariarsimasoq, maannalu tusarnaariarsimasut allat pingasut tunillatsissimasut paasineqarluni. Inuit 250-it missaanniittut tusarnaartitsisoqarnerani najuussimapput, pingasunngornermi tusagassiorfinnut nalunaarummi tamanna allassimavoq.
Angerlarsimaannarnissap misissotinnissallu saniatigut tusarnaariarsimasut tunillatsissimanngikkaluarunilluunniit mianersoqquneqarput inunnullu allanut qanillinaveersaaqquneqarlutik, tassa inuit tunillatsissimasut ullut tallimassaanni misissorteqqinnermi ajorunnaarsimalutik paasitinneqarsimagaluarlutik suli tunillaasinnaasarmata, nunatsinni nakorsaaneq erseqqissaavoq.
Qaqortumi misissortinnissamut inniminniiniaruit qaqshv@peqqik.gl-imut mailikkut allagaqassaatit. Atit, inutuut normut, najugaqarfiit oqarasuaativillu normua ilisimatitsissutigissavatit. Peqqinnissaqarfimmit piaarnerpaamik misissortinnissannut piffissaliussaq pillugu sianerfigineqassaatit.