Qaqortoq
Qaqortumi suliffeqarfiit tillinniarfigineqaqattaarput
Sapaatip akunnerata kingulliup ingerlanerani Qaqortumi politiit arlaleriarlutik nalunaarfigineqarput suliffeqarfiit tillinniarfigineqarsimanerannik
Tillinniat unnuap taarnerani Qaqortumi suliffeqarfinni nalilinnik aningaasanillu tillittarsimapput. Tillinniarnerit arfineq marluk arfineq pingasut sapaatip akunnerata kingulliup ingerlanerani pereerneranni politiit suli pasisaqanngillat. Paasiniaanermi innutaasunit ikiorneqarnissaq politiit pisariaqartippaat.
Qaqortumi politeeqarfimmi ulluinnarni aqutsisuugallartoq Sîvalêraq Terkildsen Sermitsiaq.AG-mut oqaluttuarpoq tilllinniarnerit unnuaanerani pisarsimanissaat ilimanartoq.
- Tillinniarfigineqarsimasut tassaapput suliffeqarfiit aamma pisiniarfiit taakkunanilu aningaasat allallu nalillit tillinneqartarsimapput, Sîvalêraq Terkildsen oqarpoq.
Tillinniarsimanernilli paasiniaanermi najoqqutassaasinnaasunik politiit amigaateqarput taamalu innuttaasut ikiuunnissaat kissaatigalugu.
- Tillinniarnerit pillugit inuit ilisimasaqartut imaluunniit arlaatigut pasinarsinnaasunik takusaqarsimasut politiinut saaffiginninnissaannut kajumissaarpagut, Sîvalêraq Terkildsen oqarpoq.
Qaqortumi politiit oqarasuaatigaat 701122.