Qaqortoq
Qaqortumi ujajaasoqartoq
Arnaq Qaqortumi sisamanngornermi unnukkut saassunneqarpoq taskialu tillinneqarluni
Arnaq 59-inik ukiulik Qaqortumi kollegiat ilaasa eqqaanni sisamanngornermi unnukkut qulip missaani saassunneqarpoq.
Taama Qaqortumi politiit ilisimatitsipput.
Arnaq kollegiat eqqaatigoortilluni tunuminiit saassunneqarpoq angummit inuusuttumit, imminullu illersorluni akiuutilermat nilliallunilu, saassussisumit nunamut uppitinneqarpoq.
Saassussisup, angutip kalaallip 20’t missaani ukiulittut nassuiarneqartup, taamaaleriarluni arnap taskia mobiltelefoninik marlunnik aningaasanillu 500 koruunit missaannik imalik, tillippaa. Mobiltelefuunip aappaa Iphone 5’iusoq kujataani politiini kommissæriugallartup, Sîvalêrak' Terkilsen, Sermitsiaq.AG-mut oqaluttuaraa.
Saassussisoq ima isikkulittut oqaluttuarineqarpoq:
Angut kalaaleq 20’t missaanni ukiulik, 160 - 165 cm missaani angissusilik, pualananilu salunngitsoq, koorput qarliinik tungujortunik taartunik atortoq kiisalu nasartalimmik kavaajaasalik tungujortoq taartuunngikkuni qernertumik.
Politiit aamma inunnik saassussinermut takunnissimasinnaasunik oqaloqateqarusupput.
Qaqortumi politiit oqarasuaammut 70 11 22-mut attaveqarfigineqarsinnaapput.