Qaqortup eqqaani umiatsiaaraq ujaarineqarpoq
Politiit isumaqarput inummik avammut igeriussaasoqarsimasoq.
Politiit Qaqortup Kangerluani Qaqortullu avataani umiatsiaaqqamik taartumik ujaasipput, isumaqarlutillu inummik avammut igeriussaasoqarsimasoq, taamatut allappoq knr.gl.
Qaqortumi politiit umiatsiaaraq taartoq ujarpaat, kingullermik Qaqortup Kangerluani tissukartoq takuneqarsimasoq.
Politiit ippassaq unnukkut nalunaaqutaq 18.40 nalunaarfigineqarput angallat taartoq takuneqarsimasoq Qaqortup illoqarfiata avataani umiarsualiviup Akiatalu akornanni kaavilluni ingerlasoq. Ingerlaannarlu Kangilinnguani Sakkutooqarfik peqatigalugu umiarsuaaqqamik helikopterimillu ujaasilerput. Kinguneqanngitsumilli.
Politiit ujaasinertik ullumi nangeqqippaat.
Politiit isumaqarput angummik avammut igeriussaasoqarsimasoq. Taamaattumik inuit ilaquttaminnik, umiatsiaaqqamik taartumik umiarsualiviup Akiatalu akornanni ippassaq nalunaaqutaq 18.40 missaani angalasimasinnaasumik maqaasisallit qinnuigineqarput politiinut attaviginneqqullugit.
Saaffigineqarsinnaapput telefonip normui 64 22 22 imaluunniit 49 41 22.