Qaqqanik sisoortoqarnissaanut navianaateqartoqanngitsoq
Uummannap Sulluani qaqqanik sisoortoqarnissaa kingornalu sumiiffinni inoqartuni navianartunik mallerujussuarnissaa piffissami qanittumi navianaateqartoq takuneqarsinnaanngitsoq, nakkutiginninnermiit paasissutissat nalunaarsukkat tunngavigalugit paasissutissiissutigineqarsinnaasoq, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik allappoq
Qaqqalli sivinganertaanni ujaqqat nakkaassinnaanerat annikinnerusunillu sisoortoqarsinnaanera ilimanaateqartorujussuusoq, Naalakkersuisoqarfik allappoq. Ilanngullugu nalunaarutigaat qaqqat qajannartortallit qanitaanni angalaartoqarnissaa siunnersuussutigineqanngitsoq, tassani suli navianaateqarsinnaammat. Ilusiliaq 1-imi 2-milu aappaluttumik nalunaaqutserneqarsimasuni takuneqarsinnaapput.
Decembarip qaammataani pissutsit
Umiammakku Nunaanni aamma Kangerluarsummi qaqqat qajannartortaqartut ilaanni millimeterialunniit centimeteri tikillugu nikikkiartortoqartuaannartoq, nakkutiginninnerup takutippaa.
Nikikkiartuaarnerit takuneqartut taakkua matuma kinguliani nunap assingini sumiiffiit qalipaatilerlugit takutinneqarput: Sumiiffinni tungujortuni aalasoqarneranik nalunaarsuiffiusut takutinneqarput, aappaluttumik qalipaatilinni sumiiffiit 2023-mi decembarip ingerlanerani ujaqqanik sisoortunik arlalinnik nalunaarsuiffiusimasut nalunaaqutserneqarlutik. Sumiiffik qajannartortalik ataatsimik arlalinnilluunniit ataqatigiissunik sisoortoqartarpoq, assigiinngitsunik sukkassusilinnik ingerlaartunik.
'Umiammakku Nunaat 1'-imi (Ilusiliaq 1) sisoortut allersaanni sukkasuumik nikikkiartuaarnerit ujaqqallu nakkaaneri decembarimi ingerlaannarput. Taamaattoq nunap iluata qeriartuaarnera ilutigalugu decembarip qaammataata naajartulernerata tungaanut annikitsumik arriilliartortut takuneqarsinnaavoq.
Kangerluarsummi qaqqani qajannartortalinni suli nikikkiartuaartunik aalasoqartuaannarpoq, kisianni taakkua Umiammakku Nunaata eqqaani aalasuniit malunnaatilimmik annikinnerupput. Nikikkiartuaarnerit ataasiakkaanik ujaqqanik nakkaasoqartut qaqqat innartaasa qajannartortallit appasissortaanni takuneqarput (Ilusiliaq 2).
Siorna nikikkiartuaanerit eqikkarneqartut
Ukiup nikinnera iluatsillugu matumuuna ukiumi qaqqat ilaanni nakkutigineqartuni aalasut ilusaat Naalakkersuisoqarfiup eqikkarpaat:
- Umiammakku 3-mi ukiumut nikinnerit annertunerpaartai 0.2-miit 12 m akornanniipput (Ilusiliaq 3). Sisoortut issunersaat qullerpaat ukiumut 0.2 m tikillugu annikitsuaraannarmik aalasoqartoq takutitsipput. Aalanerit annerpaartai sumiiffinni allerniittuni nalunaarsorneqarput, tamaani aalasut ukioq tamaat nalunaarsorsinnaanissaannut sukkavallaarlutik. Aasap qaammataasa ingerlaneranni sumiiffinni taakkunani ullormut nikinnerit 1 meteriusutut nalunaarsorneqarput.
- Umiammakku 1 aamma 2: Nikikkiartuaarnerit sukkanersai Umiammakku 1-ip appasinnerusortaani takuneqarput, 100 m missaanniittutut missiliorneqarlutik (Ilusiliaq 4). Umiammakku 1-ip qatsinnerusortaani nikikkiartuaartut agguaqatigiissillugu 1 meterit missaanniissimapput, Umiammakku 2-p kippasinnerusortaanituulli. Umiammakku 2-mi 2017-mi qaqqap sisoornerani unerarnerni nikikkiartuaarnerit ilaatigut annertoorujussuusut takuneqarpoq. Qaqqap sisoortup innartaani ukiup annertunerpaartaani ujaqqanik nakkaasoqartuaannartoq takuneqarsinnaavoq, taakkua ataani katersuullutik.
- Kangerluarsuk (Ilusiliaq 5): Sumiiffinni allerniittuni sukkasuumik sisoorfiusut 9 m missaannik ukiumut nikikkiartuaartut takutinneqarpoq, aammalu qaffasinnerujartornerani nikikkiartuaarnerit arriilliartorlutik. Kangerluarsummi qaqqat qajannartortallit qatsinnerusortaanni ukiumut 1 meterit missaanni nikikkiartuaartoqartoq takuneqarpoq.
Tulliani nalilersuinissaq februaarimi
Tullianik nalilersuinissaq pingasunngorneq ulloq 7. februar 2024 tamanut saqqummiunneqassaaq. Pisariaqalissappat, siusinnerusukkut paasissutissiisoqassaaq.
