Qarsoq Høegh-Dam: Kaffisoqatigiinnarpakka
Qarsoq Høegh-Damip Siumumut sinniisutut aatsitassarsioqatigiiffik ataatsimeeqatigisimannginnerarpaa. Aatsitassarsioqatigiiffik Danmarkip naalagaaffianut Naalakkersuisunullu 76 milliarder koruuninik taarsiivigineqarnissaminik piumasaqaateqartoq. Siumulli aqutsisui isumaqarput, suliaq ilungersunartorujussuusoq.
- Qanoq ilillunga Siumut sinnerlugu ETM ataatsimeeqatigisinnaagakku? Siulersuisuunernummi ilaasortaanngilanga qinigaanangaluunniit, Qarsoq Høegh-Dam erseqqissaavoq, Siumumit kina aatsitassarsioqatigiiffimmik Energy Transition Mineralsimik (ETM) ataatsimeeqateqarsimanersoq Sermitsiaq.AG -p paasiniarmagu.
ETM juulip 4-ani tusagassiuutitigut nalunaarummi allappoq, Nuummut tikeraarnerminni partiinik arlalinnik ataatsimeeqateqarsimallutik, ilaatigut Demokraatinik, Naleqqamik aamma Siumumik.
Tamatuma kingorna Siumumi aqutsisut partii aatsitassarsioqatigiiffimmik ataatsimeeqateqarsimannginnerarpaat. Partiip siulittaasuata tullia, Vivian Motzfeldt, ima itisiliivoq:
- Pingaarnerpaatut Namminersorlutik Oqartussanut taama sualutsigisumik suliassanngortitsisoqarpat (isumaqatigiissitsiniartarfimmi suliassanngortitsinissamik aarlerisaarut, aaqq.), taava partiip qalipaataa illikartillugu inuiattut ataatsimooqatigiikkusunneruvugut.
Siumuusariaqarpoq imaluunniit Siumuusariaqanngilaq
Taamaattumik Siumut ETM-imik tikeraarnerani aamma naapeqateqarusussimanngilaq.
Taamaakkaluartoq aatsitassarsioqatigiiffik isumaqalersimavoq, Qarsoq Høegh-Dam partiimut sinniisuusoq. Siumup aqutsisui naapeqatiginnittoqarsimannginnerannik saqqummiussereersullu aatsitassarsioaqatigiiffiup saqqummiussani allanngortippaa partiimut attuumassutilimmik naapeqateqarsimallutik.
- Qanittukkut Nuummiinnitsinni naapeqateqarpugut Siumut partiimut attuumassuteqartumik, kisianni sinniisutut qaffasissumi inissisimasuunngitsumik, aatsitassarsioqatigiiffik ilaatigut Siumup aqutsisuinut akissutimini allappoq.
Kisianni Qarsoq Høegh-Damip Siumup sinniisuatua najussimanini suli ilumuunnginnerarpaa.
- Sulisut ilaannik ilisarisimasaqarpunga taannalu kaffisoqatigiinnartussaallugu, soorluttaaq KNAPK aamma suliffeqarfiit kattuffiillu allat kaffisoqatigisarikka.
Taassuma nassuerutigaa, kaffisoqatigiinnermi aatsitassarsioqatigiiffimmeersunik allanik aamma najuuttoqartoq, tamannalu Sermitsiaq.AG-p paasissutissaatai naapertorlugit juunip 19-iani pisimavoq, ulloq taanna Demokraatit siulittaasuata aamma Naleqqap siulittaasuata aatsitassarsioqatigiiffimmik ataatsimeeqateqarfigisaanni.
Vivian Motzfeldtili isumaqarpoq, immikkoortortaqarfimmut siulittaasutut suliami taama torinngitsigisumi illuatungiliuttuusumik inuinnartut naapeqateqartoqarsinnaanngitsoq.
- Siumuusariaqarpoq imaluunniit Siumuusariaqanngilaq. Taannami Siumut Nuummut siulittaasuuvoq, Vivian Motzfeldt oqarpoq nangillunilu:
- Inuttut qanoq nuannarineqartiginerput pineqaannanngilaq, tunngavippiaatigulli ataatsimooqatigiiffitsinnik, inuiattut nukittuneruffigisatsinnik, nassaarniarnissaq pineqarluni.
Nunatsinnut Qarsumullu kinguneqartitsisoqassava?
Taassuma erseqqissaatigaa, suliani tamakkunatut ittuni namminersuutiginninneq nunamut tamarmut annertuunik kinguneqarsinnaasoq.
- Ilungersunartorujussuuvoq. Partiimut akisussaaffeqaraanni aamma ilisimaneqartariaqarpoq, siulersuisuunerit avaqqutiinnarneqarsinnaanngimmata. Aatsitassanut tunngasuni politikkerput allanngorsimanngikkaluartoq nunatut tamat oqartussaaqataanerannik ingerlatsiviuvugut qinersinermilu innuttaasut oqariartuutaannik ataqqinnippugut.
Siumut uranip inerteqqutaalernissaannik inatsit taperserlugu 2021-mi taasinngilaq, apeqqullu taannarpiaq ukiuni qulikkuutaani arlalinni nunatsinni partiit anginerit marluk akornanni akerleriissutaasimavoq.
Suliaq Qarsoq Høegh-Damimut kinguneqartinneqassanersoq partiimi aqutsisut sapaatip-akunnerata naanerani ataatsimeersuarnermi aallartitanut aalajangigassanngortinniarpaat..