Qasigiannguani ukiuni pingasuni ernisoqarsimanani meerartaartoqartoq
Qasigiannguani ukiuni pingasuni ernisoqarnikuungilaq, naartusut Ilulissanut imaluunniit Nuummut erniartortarnerat pissutigalugu. Sapaatiummalli ernisoqarpoq. Aaka Qasigiannguani inunngorpoq.
Nukappiaraq inequnartoq Qasigiannguani sapaatiummat inunngorpoq. Inunngortussaq nunarsuarmut tikilluaqquniarlugu ilaqutariit nuummukarnissaminnut piareersarsimagaluarput. Kisianni nukappiaraq Qasigiannguani inunngorusussimannguatsiarpoq.
- Nuummut erniartornissamut suna tamaat aaqqereernikuugaluarparput, ilaquttama inissaat allallu, aqagumut aallartussaagaluarluta ilimaginngisatsinnik pisoqarpoq. Ilaquttat angerlarsimaffillu qimanngikkaluarlugit ernilluni pilluarnarpoq, ingasammik atissannguata panigigaluamma maani qimagunnikuunera eqqarsaatigalugu maani inunngornera assorujussuaq uagutsinnut isumaqarpoq, Konny Lundblad nukappiaqqamut anaananngorlaaq oqarpoq.
Pisoq qaqutigoortoq
Illoqarfinni mikinerneersut illoqarfinnut anginerusunut erniartortinneqartarput. Kommune Qeqertalik nittartakkamini allappoq ukiut marluk pingasullu akornanni Qasigiannguani inunngortoqarsimanngitsoq.
Konny Lundblad ilaquttanilu ataasinngornermi februaarip ulluisa aqqaneq-aappaani nuummuartussaagaluarput. Nukappiararli Qasigiannguani inunngorusussimannguatsiarami sapaatiummat februaarip aqqarngani ullaakkut nal. 05:15 silarsuarmut appakaappoq. Anaanaq ernerlu ajunngillat.
Qujanartumik nakorsaqarpoq
Aaka inunngortussanngormat nakorsaq ernisussiornermi nakorsatut ukiuni 25-ini misilittagaqartoq Qasigiannguaniippoq. Taamaattumik anaanaasoq toqqissisimasimavoq.
- Maani ernisussanngornera paasigatsigu tupannaqqaarpoq ernumaammernarlunilu, kisianni nal. 05:15 inunngorami peqqilluni kusanarlunilu assut pilluarnarpoq iluatsitseqalutalu Qasigiannguit nakorsaqarallarnerani taamak pisoqarmat, Konny Lundblad oqaluttuarpoq.
Kommune Qeqertalik nittartakkamini allalluni meerartaartut Konny Lundblad aamma Jens-Isak Storch, aleqanngortorlu Aimie Petersen, ilaqutaasullu tamaasa pilluaqquai.