Qassutikut akornannut eqqaasarneq akiligassinneqarnermik kinguneqarsinnaavoq
Qassutikut Kommuneqarfik Sermersuumi eqqakkanik tigooraavimmut tunniunneqartarnerat akikinnerulissaaq. Eqqakkalli qassutikut akornanniittut siunissami immikkut akiligassinneqarnermik nassataqarsinnaalissapput.
Qassutikut akornannut eqqaaneq inerteqqutaavoq, igitsisoqassappallu eqqaasoq siunissami aalisarnermi atortukuni igitsiniarnerminik akisunaarisinnavoq.
Kommuneqarfik Sermersooq nittartakkamigut taamatut ilisimatitsivoq.
- Eqqakkat allat aalisarnermi atortukut akornaniittassanngillat. Immikkoortinneqartassapput isumannaatsumillu iginneqartassallutik. Eqqagassat allat aalisarnermi atortukut akornannut iginneratigut atoqqiinissamut aningaasartuutit qaffarujussuarsinnaapput, taakkulu aningaasartuutit akileraartartumut tuttussanngortussaallutik, Kommimeqarfik Sermersuumi Avatangiisinut pisortaq Frank Rasmussen oqarpoq.
Eqqakkanik Tigooraavik suliniummik nutaamik suliaqarpoq, tassani aalisarnermi atortukut tunniunneqartut nalunaarsorneqartassapput, inuk tunniussissimasoq pisariaqartitsisoqarnerani paasineqarsinnaaniassammat.
Taamalu kommuni siunissami inummut qassutikunik tunniussisimasumut akiligassamik nassitsisalissalluni.
Qassutikunik tunniussineq akikinnerungaatsiartoq
Kommuneqarfik Sermersooq aalajangersimavoq, qassutikunik, ningittakkanik qalorsuarnillu atorunnaarnikunik tunniussinermi akigititaq malunnaatilimmik apparneqassasoq. Aalisarnermi atortukunik 1 tonimut unniussinermi akigititaq 180 koruuninut appartinneqarpoq, Siornatigut akigititaq 650 koruunit missaanniissimavoq.
- Igitassalli immikkoortinneqareersimassapput, eqqagassanullu allanut akulerussimanatik.
Taamatut piumassaqaateqarnermut tunngaviuvoq, qassutikut atorunnaarnikut Danmarkimut atoqqitassanngortussanngorlugit nassiunneqartarnerat, tassani salinneqaqqaartarput mikisuaranngortinneqarlutillu, kingornalu plastikkiliarineqarlutik.