Qatserisartoq unnerluunneqartoq: Peqatigiiffiup aningaasaataanik 49.000 koruuningajannik tigusisimasoq
Angut Qeqqata Eqqartuussiviani sisamanngornermi eqqartuunneqartussanngorpoq. Pineqartoq peqquserlulluni peqatigiiffimmit katillugit 49.000 koruuningajannik ukiut marluk ingerlaneranni tigusisarsimasutut unnerluunneqarpoq.
Qatserisartoq Qeqqata eqqartuussiviani, peqquserlulluni aningaasanik tigusisimasutut unnerluunneqarluni sisamanngornermi 7. marts eqqartuunneqartussanngorpoq.
Unnerluussut Sermitsiaq.AG-mut tunniunneqartoq naapertorlugu pineqartoq ukiut marluk ingerlaneranni katillugit 48.763 koruuninik peqatigiiffimmit tigusisarsimavoq.
22. februar 2021-miit 26. januar 2023 tikillugu aningaasat Grønlandsbankeni aqqutigalugu, Sisimiuni Qatserisartut Peqatigiiffianni aningaasanik aqutsinissaminik pisinnaatitsissut atornerlullugu, aningaasanik tigusisarsimavoq.
Atsiornerit peqquserluutigigai
Unnerluussut naapertorlugu unnerluutigineqartup ukiut marluk ingerlanerani katillugit 15-eriarluni peqatigiiffimmit aningaasanik tigusisarsimavoq.
- Piffissani piffimmilu pineqartuni, Grønlandsbankenimi sulisunik inatsisitigut nakutitsiniarluni, Sisimiuni Qatserisartut Peqatigiiffiat-a aningaasaataanit aningaasanik tigusinermi immersugassanik peqquserlulluni atsiornermik atsiornilersoramigit, unnerluutigineqartup immineerluni immersorlugit aammalu peqquserlulluni pilersitsisumit pisuunngitsunik (...) atsiornernik atsiornilerlugit, unnerluussummi allassimavoq.
Unnerluussisussaatitaasup piumasaraa qaammatini marlunni pinerlussimasunut inissiisarfimmiitsinneqassasoq, peqatigiiffimmullu 48.763 koruuninik taarsiisinneqassasoq.