Qeqertalik: Innuttaasut aningaasaateqarnerulissapput
Kommune Qeqertalimmi innuttaasut aappaagu akileraarnikinnerulerlutik aningaasaateqarnerulissapput.
Kommuni aalajangerpoq kommunimut akileraarut 2 procentpointimik appassallugu.
Qeqertalimmi kommunalbestyrelsep aappaagumut aningaasanut missingersuut akuersissutigisussanngoramikku takusinnaareersimavaat akileraarutinit isertitat annertuallaalertut, tamannalu pissutigalugu kommunimut akileraarut 26 procentimut appartinneqarpoq. Kommuni siusinnerusukkut nalunaaruteqareersimavoq aappariit SIK malilllugu akissarsiaqarunik, akileraarnikinnerulernermi naatsorsuutigisinnaagaat ukiumut 11.520 koruuninik aningaasaateqarnerulernissaq.
Kommuni tusagassiorfinnut nalunaaruteqarluni akileraarutip apparneranut pissutiginerarpaa nioqqutissat akitsoriartuinnarnerini innuttaasut atugaat oqinnerulersinnissaat kissaatigineqartoq. Ukiunut ajornernut aningaasanik peqqumaateqalernissaq tunulliullugu, aalajangerneqarpoq innuttaasut aningaasaateqarnerulissasut. Kommunip aningaasartuutigisartagaasa ukiumut qanoq annertutigisumik qaffanneqartarnerat killilerneqarnikuuvoq.
Aqquserngit iluarsaanneqassapput
Aningaasanut missingersuummi atuarneqarsinnaavoq Kangaatsiami, Ikamiuni aamma Ikerasaarsummi aqquserngit iluarsaanneqassasut. Kommunimi qamutit motoorillit taarserneqassasut aamma allassimavoq, utoqqarnullu bussit iluarsaanneqassallutik kiisalu Aasianni kranilersuisoqassalluni. Sanaartornermut aningaasaliissutit missingiussat 50 milliuunit koruuniupput, 2024-milu upalungaarsimanermut aamma aningaasaliisoqarpoq. Ukiunut pingasunut tullernut atortunik nutarterinissamut aamma aningaasaliisoqassaaq.
Kommunimit pisartakkat nalimmassarneqassapput, kommunimullu akiligassarineqartartut 3,47 procentimik qaffanneqassasut aalajangerneqartoq, ilisimatitsissutigineqarpoq.