Qeqertarsuup tunuani pisassat aamma tamakkerpaat

Qeqertarsuup tunuani umiatsiaararsorlutik qaleralinniat sapaatip akunnerunngitsoq novemberimut pisassat 200 tonsit nungulerpaat. Kingulliugallartumik tunisineq pingasunngorneq novemberip arfernat pissaaq.

Qeqertarsuup tunuani misileraalluni pisassat 700 tonsit kingusinnerusukkut naliginnaasumik pisassanngortinneqartut umiatsiaararsortut maanna aalisarpaat.

Novemberimut pisassat 200 tonsiupput taakkulu nungunneqarluinnalerput. Taamaammat umiatsiaararsortut kingulliugallartumik novemberip arfernat tunisissasut Kalaallit Nunaanni aalisarsinnaanermut akuersissutinik nakkutilliisoqarfik nalunaarpoq.

Qeqertarsuup tunuani umiatsiaararsortut decemberip aallaqqaataani aalisaqqilissapput tamatumuuna qaammamut pisassaat 100 tonsiussallutik.