Qeqertarsuup Tunuani qaleralinniarneq ajalusoorsinnaasoq
Qeqertarsuup Tunuani qalerallit suli milligaluttuinnartut, tamannalu aalisarnerup sakkortuallaartumik ingerlanneqarneranik tunngaveqartoq, biologit ukioq manna misissuinerisigut aammarluni paasineqarpoq. Pinngortitaleriffiulli qaleralinnik misissuinerata uppernassusaa Ilulissani aalisartut piniartullu peqatigiiffata apeqqquserpaa.
Junip julillu ingerlanerani Pinngortitaleriffiup umiarsuaa misissuut Sanna Uummannap Qeqertarsuullu Tunuani qaleraleqassuseq qalerallillu angissusaat pillugit, ukiumoortumik misissuivoq. Angalanermi qassutit atorlugit qaleralinniartoqarpoq, pisarineqartullu amerlassusaat angissusaallu siornatigut pisarineqartunut nallersuunneqassapput. Aammali illoqarfinni nunaqarfinnilu aalisakkerivinnut qalerallit tunineqarsimasut taamatuttaaq ilanngullugit misissuiffigineqarput.
Aviisi Sermitsiaq taama allappoq.
Umiarsuaq misissuut atorlugu misissuinermi paasisat tunitsivinni, tunineqarsimasunut naleqqiullugit assigiinngissutaat paasiniarneqartunut ilaavoq. Qeqertarsuullu Tunuani qaleralinniarneq maannakkutut annertutigisumik ingerlaannassappat, siunissami qaleraleqassuseq innarlerluinnarneqaratarsinnaasoq, Pinngortitaleriffimmi Aalisakkanik Qalerualinnillu immikkoortortaqarfimmi biologi ilisimatusartorlu, Rasmus Nygaard oqarpoq. Qaleraleqassutsilli taamatut inissisimanera pillugu Pinngortitaleriffiup taamatut nalunaaruteqarnera, Ilulissani aalisartut piniartullu peqatigiiffianiit isumaqatigineqanngilaq.
Qalerallit milliartortut
Qeqertarsuup Tunuani qalerallit ikiliartorlutillu milliartutut, ukiullu arlallit taamaattoqarsimasoq, aasaq manna ukiullu siuliini biologit misissuinerisa takutippaat.
- Ukiut ilaanni qalerallit tukertut amerlasimappata, qaleraleerarpassuit ukiuni taakkunani tukertut, qaleraleqatigiiaani pioreersuni qaleralinniit anginerunngitsut amerlasoorujussuanngorsinnaapput. Taamaalilluni qalerallit amerlaneruleraluarlutik, piffissap ilaani qalerallit mikinerusut amerlanerulersinnaapput, Rasmus Nygaard Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: