Qeqqa 2.500-eriarluni bankikkut aningaasanik nuussissasoq
Namminersorlutik Oqartussat qarasaasiakkut sillimaniarnermi innarlertoornerat Qeqqata Kommunianut suliassaqarnerulersitsivoq. Kommunip pisortanit pisartagallit pisassaminnik kinguaattooruteqqaqunagit suliat ataasiakkaarlugit bankikkut aningaasanik nuussuiffigai.
Namminersorlutik Oqartussani qarasaasiakkut sillimaniarnermi unioqqutitsilluni isertoqarsimanera namminersorlutik oqartussani kommuninilu aningaasaqarnikkut attaviit arlallit eqqorneqarput.
Kommunini ikiorsiissutit tunniunneqarnissaat kinguaattoortussatut naatsorsuutigineqarpoq. Qeqqata Kommuniatali tamanna unissutiginianngilaa.
Kommuni tusagassiorfinnut nalunaaruteqarluni ilisimatitsivoq pisortanit pisartagaqartut eqqugaanissaat pinngitsoortinniarlugu, pisartagaqartullu sapinngisamik piffissaq eqqorlugu pisartakkaminnik tunineqarnissaat anguaniarlugu suliat ataasiakkaarlugit bankikkut nussuinermik kommuni suliaqartoq.
- Tamatuma malitsigisaanik suliassat qaavisigut sulisut suliassaqartinneqarput, qarasaasiatigullu sullissineq aaqqinneqareerpat aamma suliassaqartinneqassallutik, marloriaammik pisartagaqartunut nuussisoortoqarsinnaanera pinngitsoortinniarneqassammat, Qeqqata Kommunia tusagassiorfinnut nalunaaruteqarluni allappoq.
Qeqqata Kommunia banki aqqutigalugu ima amerlatigisunik nuussivoq:
- 900-it missaannik amerlassusillit pisortanit ikiorsiissutinik pisartagaqarput.
- 500-it missaannik amerlassusillit suliffeqanngikkallarnermi pisartagaqarput.
- 200-it missaat erninermut atatillugu ikiorsiissutinik pisartagaqarput.
- 750-it missaat pisortanit soraarnerussutisiaqarput.
- 200-it missaat siusinaartumik soraarnerussutisiaqarput.
Kommuneqarfik Sermersooq aamma nalunaarpoq namminersorlutik oqartussani qarasaasiakkut sillimaniarnera innarlerneqarmat, atortorissaarutillu matuneqarallarnerini pisortanit pisartagaqartut pisartagaat kingusinaartussanngortut. Kommuneqarfik Sermersuup naatsorsuutigaa namminersorlutik oqartussat atortorissaarutai ingerlaqqilerpata pisartagallit kingusinaartumik pisartakkaminnik tunineqassasoq. Namminersorlutik Oqartussat ilisimatitsipput atortut sisamanngornermi nalinginnaasumik ingerlalereernissaat naatsorsuutigalugu.
Akiligassat kingusinaartumik akilerneqassasut
Namminersorlutik Oqartussat datakkut attavinnik kipisingallarneranni Qeqqata Kommunia akiligassanik piffissaq eqqorlugu akiliisinnaajunnaarallarpoq.
Kommuni ilisimatitsivoq qarasaasiakkut atortut ingerlaqqilerpata akiligassat akilerneqarumaartoq.
- Qarasaasiatigut aaqqissuussineq aallarteqqinniarlugu sulissutiginnittoqaleruttorpoq, naatsorsuutigineqarporlu akiligassat kinguaattoorutaasut sapaatip akunnerata tulliata aallartisimalernerani qaangerneqarsinnaassasut akiliisarnerlu pissusissamisut ingerlaqqilersinnaassasoq, kommuni allappoq.