Qeqqa: Kommunalbestyrelsemi ilaasortaq pisortanngulersoq
Qeqqata Kommuniani kommunalbestyrelsemi ilaasortaq, kommunimi 1. julimiit atugarissaarnermut pisortanngortussanngorpoq. Atorfininnerminut atatillugu kommunalbestyrelsemi ilaasortaanerminit tunuassaaq.
Økonomiudvalget i Qeqqata Kommunia har besluttet at ansætte medlem i kommunalbestyrelsen, Paneeraq Olsen, som direktør for velfærd i Qeqqata Kommunia.
1. juli atorfinissaaq.
Paneeraq Olsen isumaginninnermi suliassaqarfimmut kommunillu ingerlanneqarneranut ilisimasaqarluarnera pissutigalugu atorfinitsinneqalerpoq. Atorfininnissaalu pisortat nuannaarutigaat.
- Qeqqata Kommuniani suleqatigeqqittussanngoratsigu nuannaarutigaarput qilanaareqaarpullu, Qeqqata Kommuniani pisortaaneq Juliane Henningsen Heilmann oqarpoq.
Paneeraq Olsen meeqqanut, inuusuttunut ilaqutariinnullu Naalakkersuisuusimavoq, Inatsisartunilu qinikkatut ilaasortaanermini ilaqutariinnut peqqissutsimullu ataatsimiititaliami aamma ilaasortaasimalluni, kommuni tusagassiorfinnut nalunaaruteqarluni allappoq.
Atorfinittussaq Qeqqata Kommuniani pisortaanertut aamma atorfeqarnikuuvoq. Maannalu kommunalbestyrelsemi atuuffeqarami, pisortatut atorfinikkuni politikki qimattussanngorpaa.
Martha Lund Olsen paarlassagaa
Paneeraq Olsen 1. juli aallarnerfigalugu atugarissaarnermut pisortanngussaaq. Taamaasilluni Martha Lund Olsen, siorna martsip aallaqqaataaniit atorfimmiissimasoq, paarlattussanngorpaa.
- Atorfeqarnermini sulisut pitsaasunik sakkussaqarnissaat, siunnersorneqarnissaat, atugaqarnissaat, sinaakkuteqarnissaat aammalu pikkorissartarnissaat ilinniagaqarnissaallu pingaartillugit suliniarpoq, taamaaliornikkut innuttaasut pitsaasumik pilertortumillu sullinneqarnissaat anguneqarsinnaammat, kommuni allappoq.
Paneeraq Olsen allaffissornikkut qaffasissumik ilinniagartuujuvoq.