Qeqqani atuartut angusaqarluarput

Qeqqata Kommuniani atuartut misilitsinnerni angusarissaartut tulluusimaarutigineqarsinnaapput.

Kommunimi atuarfinni pitsaassutsimut nalunaarusiaq pillugu Qeqqata Kommuniani kommunalbestyrelsi ilisimatinneqarpoq. 3. aamma 7. klassimi atuartut misilitsittarput, atuartullu atuagarsornikkut killiffii misilitsinnerit takutittarpaat. 3. aamma 7. klassimi angusat takutippaat atuartut arlalitsigut angusarissaartut.

Qeqqata Kommuniani 3. klassit kalaallisut matematikkimilu nuna tamakkerlugu agguaqatigiissillugu angusarissaarnerulaarput, qallunaatullu angusaat nuna tamakkerlugu agguaqatigiissillugu angusatut ipput.

Kalaallisut angusarissaarnerpaasut

Atuartut 7. klassimiittut misilitsinnerisa angusaasa takutippaat kalaallisut, qallunaatut matematikkimilu nuna tamakkerlugu agguaqatigiissillugu angusarissaarnerulaartut. Kommunimi 7.klassit tuluttut angusaat nuna tamakkerlugu agguaqatigiissillugu angusat naligaat. Nukappiaqqalli niviarsiaqqallu angusaat assigiinngissuteqarput. Niviarsiaqqat kalaallisut qallunaatullu angusarissaarnerupput, nukappiaqqalli matematikkimi angusarissaarnerullutik, nalunaarusiami allassimavoq.

Kalaallisut soraarummeernermi atuarfiit nuna tamakkerlugu agguaqatigiissillugu angusarissaarnerupput. Sisimiuni atuarfiit marluk qallunaatut matematikkimilu angusarissaarnerupput, sinneri agguaqatigiissillugu angusarissaarnernit appasinnerusumik angusaqarlutik. Tuluttulli angusat nuna tamakkerlugu agguaqatigiissillugu angusat ataappaat.

Qeqqata Kommunianiilli oqaatigineqarpoq tuluttut angusat ukiunut atuarfiusunut siuliinut naleqqiullugit pitsanngoriarsimasut.

- Kommunalbestyrelsemiit innersuussutigaarput angusanik nalilersuinermi nuna tamakkerlugu agguaqatigiisitsinermut taamaallaat nallersuussisarneq atornagu, kommunitsinni atuarfiit imminnut nallersuunnerat nalilersuinermi isiginiarneqarnerulissasoq. Pissutigalugu tassuunakkut takuneqarsinnaammat atuarfinni sorlerni suut angusarissaarfiusimallutillu pitsaannginnerusunik angusaqarsimanersut, borgmester Malik Berthelsen, tusagassiuutinut nalunaarummi oqarpoq.

Ilinniartitsisut sulinngitsuungaatsiartartut

Qeqqata Kommuniani kommunalbestyrelsi ilisimatinneqarpoq atuartut atuanngitsoortartut amerlasuujusut.

Ilinniartitsisut amerlanersaat akuerineqarani sulinngittarneri nungungajaavissimapput.

- Atuarfiit 5 % sinnerlugu inissisimasut ilinniartitsisut peqanngittarnerannik apparsaaniassapput. 2022-mi COVID-19 atuartut ilinniartitsisullu peqanngittarnerannut sunniuteqaqataasimasinnaavoq, nuna tamakkerlugu tuniluunneq atugaanikuummat.