Qeqqanut inissiat amerlanerusut
Namminersorlutik Oqartussat Qeqqatalu Kommunia isumaqatigiipput siunissami Sisimiuni Maniitsumilu inissianik sanaartorneq ataqatigiissaarneqarlunilu annertusineqassasoq.
Namminersorutik Oqartussat Qeqqatalu Kommunia siunissami qaninnerpaami Sisimiuni inissianik sanaartorneq pillugu suleqatigiinnissamik isumaqatigiissuteqassapput, taama nalunaarput Naalakkersuisunut ilaasortaq Jens B. Frederiksen aamma borgmesteri Hermann Berthelsen.
Suleqatigiinnissap siunertaraa piffissaq sivikitsoq eqqarsaatigalugu Sisimiuni inissaaleqinerup annikillinissaa inissialiornerup annertusineratigut. Suliassat siulliit ilagissavaat aasaanerani 2010-mi Sisimiuni Akiani inissianik arlalinnik pingasunik qaleriinnik tamarmik 12-nik inissiaqartunik sanaartorluni aallartinnissaq.
Ukiut qaninnerpaat ingerlanerini illut taamaattut Akiani sananeqassapput, piffissalli ingerlanerani inissiat allat innuttaasunut allanut tulluarsakkat sanaartorneqassapput, iluatungeriit neriorsuipput.
Aluminiuliorfiliornissaq piviusunngussappat, suleqatigiinneq Maniitsumik aamma ilaneqassaaq. Taamaassappat inissianik atorfissaqartitsineq annertoorujussuussaaq, misissuigallarnerillu malillugit ilimanarpoq Maniitsumi inissialiorneq avataaniit aningaasaliinikkut ingerlanneqarsinnaasoq, taamatut ataatsimoorussamik tusagassiuutitigut nalunaarummi allassimavoq.