Qeqqata akileraarut taamaaginnartippaa
Innuttaasunik sullissineq sipaarniutinit eqqorneqassanngilaq.
Qeqqata Kommuniani kommunalbestyrelsi tamarmiusoq isumaqatigiillutik akuersissutigaat 2011-mut missingersuutit - taamaattorli.
Aappaagumut missingersuutini 41,2 millioner koruuninik amigartooruteqarnissaa takuneqarsinnaavoq, kisianni decembarimi ataatsimiititaliat tamarmik fem procentimik immikkoortortaqarfinni ataasiakkaani sipaaruteqassapput. Kommunip 2011-mi ingerlatsinermut aningaasartuutissai tamarmiusut 546 millioner koruuniupput, sipaarutillu fem procentiusut aningaasanngorlugit 27 millioner koruunit. Taakku ilanngullugit naatsorsuutigineqartumik amigartoorutit 14 millioner koruuninut apparput.
– Aningaasaqarnerput ajunngilluinnarpoq, taamaattumik kommunimut akileraarutip 25 procentiutiinnarsinnaavarput naak 2011-mi annikitsumik amigartooruteqartussaagaluarluta, borgmester Hermann Berthelsen sermitsiaq.gl -imut oqarpoq.
Borgmesterip qularutiginngivippaa ataatsimiititaliat fem procentimik sipaarniuteqarnissaminnut iluatsitsinissaaq - aamma innuttaasunik sullissineq eqqunngikkaluarlugu. Sipaarniuteqarneq tamanut atuuppoq; aamma politikkikkut tunngasutigut, ilaatigut videot atorlugit ataatsimiittarnerit angalanermut aningaasartuutit ingalassimaartissimavaat.
Sanaartorneq ingerlavoq
Sanaartugassatut pilersaarutigineqartut aningaasaqarniarnikkut ajornartorsiuteqarnermit piviusunngortinneqarsinnaanngippata atorniarsinnaaneq kommunalbestyrelsip akuersissutigaattaaq.
– Akiitsoqanngilagut, taamaattumillu sanaartugassat pisariaqartut ingerlanneqassappata taarsigassarsinissamut annilaanngatissaqarata, Hermann Berthelsen.
2011-mi Qeqqata Kommuniani sanaartornerup ingerlalluarnissaa borgmesterip ilimagaa. Kommunip akuersissutigaa sanaartugassat 65 millioner koruuninik nalillit, 2011-imullu aningaasanut inatsit novembarip ulluisa 15-ianni akuersissutigineqartoq Nuup avataatigut sanaartornerulernissamut periarfissiivoq.
2011-mut akileraarut
Ulluni makkunani 2011-mi kommunimut akileraarutip procentinngorlugu annertussusissaa aalajangerneqassaaq.
Kommune Kujallermi aamma Qaasuitsup Kommuniani akileraarut procentimik ataatsimik qaffanneqarpoq 28 procentinngorlugu, taamaalilluni nuna tamakkerlugu akileraarut kommunillu ataatsimoortumik akileraarutaat ilanngullugit akileraarut katillugu 45 procentiussaaq.
Qeqqata Kommunia aalajangereerpoq akileraarutip 25 procentiutiinnarnissaa, marlunngornermilu ualikkut Kommuneqarfik Sermersooq aamma taamaaliussaaq, taamaalilluni kommunini taakkunani akileraarut katillugu 42 procentiussaaq.
Qeqqata Kommunia har allerede vedtaget af fastholde sin skatteprocent på 25, og tirsdag eftermiddag vil Kommuneqarfik Sermersooq gøre det samme, så den samlede skatteprocent i disse to kommuner bliver 42.