Qeqqata Kommunia: Isumaginninnermut aningaasartuutit qaffakkiartortut missingersuummut sunniuteqarput
Qeqqata Kommuniani kommmunalbestyrelsip akuereqqammerpaa 2024-mut ukiunullu missingersuusiorfiusunut 2027-ip tungaanut missingersuut. Isumaginninnermut aningaasartuutit qaffakkiartornerisa missingersuusiorneq ajornakusoortippaa, taamaattorli katillugit 40,5 millioner koruuninik sinneqartoornissaq kommunip naatsorsuutigaa.
Qeqqata Kommuniani borgmesteri, Malik Berthelsen (S) tamaviaaruteqarpoq Namminersorlutik Oqartussat suliffeqarfiinik ingerlatsiviinillu sinerissap sinneranut siammarterisoqarnissaanik, maannakkut Nuummi suut tamarmik katersorneqarnerat unikaallatsillugu.
- Takuinnarneqarsinnaavoq nunatsinni innuttaasut katitigaanerisa ineriartornerat. Taassuma immini oqaluttuarivaa nunatsinni sulisinnaasut amerliartuinnavittut Nuummi katersuunneqartut, uffa sinerissap sinnerani missingersuutinik ataqatigiissitsiniarsaraluni ilungersortoqartoq, borgmesteri Naalakkersuisunut kingumut erseqqissaateqarpoq.
Borgmesteri kingusinnerpaamik politikkikkut ataqatigiissaarisunut siunnersuuteqarpoq suliffeqarfiit ingerlatsiviillu sinerissap sinneranut siammarterneqassasut.
Taamaattorli malunnaatilimmik allanngortoqarsimanngitsoq, kommunip missingersuusiornerani isumaginninnermut aningaasartuutit qaffakkiartornerat nutaanik iliuuseqarnissamut killilersimaarinnittoq ersersinneqarpoq:
- Inunnik isumaginninnerup iluani aningaasartuutit ukiuni kingullerni annertuumik qaffakkiartornerat pissutigalugu ingerlatsinermut aningaasartuutinik qaffassaataasussanik kissaateqartoqassanngikkallartoq kommunalbestyrelsimi isumaqatigiissutigivarput, kommunip nalunaaaruteqarpoq.
Taamaakkaluartoq nutaanik iliuuseqartoqassaaq
Taamaakkaluartoq, tassa isumaginninnermut aningaasartuutit qaffakkiartornerat kigaallassaasutut oqaatigineqarsinnaagaluartoq, taamaattoq akileraarutitigut isertitat amerlisimanerisigut, ukiunut siuliinut marlunnut sanilliullugu akissaqartoqarpoq nutaanik iliuuseqarnissamut.
- Taamaasilluta Kangaamiuni Maniitsumilu atuarfiit iluarsartuunneqarnissaannut ukiut siuliini aningaasaliissutitta saniatigut qulequttanut tulliuttunut ukununnga nutaanik aningaasaliissuteqarpugut:
- Nunaqarfinni aqquserngit iluarsartuunneqarnissaat.
- Sisimiuni arsaattarfiup toqqaviata ajornera pissutigalugu sumiiffimmi allami nutaamik taarserneqarnissaa.
- Maniitsumi qamussuit nutaanik taarserneqarnissaat.
- Itillimi Illorput 2100-ip katersortaffinngortinneqarnissaa.
- Sisimiuni Maniitsumilu tusarnaartitsinermi nipilersuutit nutaanik taarserneqarnissaat.
- Kuuffissualersuinerit nanginneqarnissaat.
- Sisimiuni puiguttunngortunut nutaamik angerlarsimaffiliornissamut ileqqaarineq, tassani Namminersorlutik Oqartussat affaanik akileeqataanissaat qinnutigineqassaaq.
- Sisimiuni Nattoralinnguup tunuani nutaamik sisortarfiliornissaq.
- Apussuarnut ATV-inut aqqusinniornissaq.
Ukiut siuliini aningaasaliissutit atorlugit nunaqarfinni sanaartornerit ingerlasut pilersaarutaasullu tassaapput, Sarfannguani timersortarfeeraliorneq, Atammimmi inuusuttunut inissialiorneq, Kangerlussuarmi utoqqarnut pisinnaanerusunut inissialiorneq Kangaamiunilu atuarfiup annertuumik iluarsartuunneqarnissaa. Taamasilluni inoqarfiit tamangajalluinnarmik sanaartorfigineqarnissaat sanaartorfigineqartutullu oqaatigineqarsinnaapput, Qeqqata Kommunia ilisimatitsivoq.
Ilanngullugu Qeqqata Kommuniata ilisimatitsissutigaa kommunimut akileraarut allanngorani 26%-imiiginnassasoq.