Qeqqata Kommunia sulisuminut nersornaasiisut
Juulli sumi tamaani malugineqarsinnaavoq. Juullili Qeqqata Kommuniani amma malugineqarluarsinnaasimavoq 2021-mi sulisutsialaat kajumissaaserneqartullu nersornaaserneqarmata.
Qeqqata Kommuniani sulisut 1.300-it missaaniipput. Taakkua illoqarfinni marlunni nunaqarfinnilu arfinilinni agguataaqqapput. Ukioq manna suleqataasut innersuussinerisigut suleqatitsiallat kajumissaasikkallu toqqarneqarput.
Maalia Larsen Rosing Maniitsumi meeqqerivimmi pisortaasoq ukioq manna sulisutsialattut nersorneqarpoq aamma Ansu L. Olsen Sisimiuni allaffimmi fuldmægtigi nersornaaserneqarpoq.
- Akaareqatigiinneq inuunerivaa, meeqqerivimmi meeqqat, angajoqqaat aamma sulisut atassuteqaqatigiilluarnermik naleqartitsilluni aamma ileqqoralugu maligassiuisumik pissuseqarnissaq pingaartillugu siammaasuuvoq. Meeqqerivimmi sulisut piginnaasassaannik tungiorlugit pikkorissartarlugit, angajoqqaanut attaveqarluarnissamik pingaartitsilluni, meeqqanut ataasiusutut peqatigiittuarnissaannut naleqartitsisuuvoq, Qeqqata Kommunia tusagassiuutinut taama ilaatigut Maalia Larsen Rosing sulisutsialanngorneranut tunngavilersuivoq.
Allaffimmi fuldmægtigi, Ansu L. Olsen Sisimiuni aamma sulisutsialattut toqqarneqarpoq. Taassuma qungujulasuujuarnini ilakkuminartuuninilu ilisarnaatigai.
- Ansup suleqatini nalornissuteqaraangata ikiortuartarpai, naak nammineq aamma saniatigut ulapittaraluaqaluni immikkoortortaqarfiit allat ammaffigiuarpai ikiuukkiassalluni. Suliaminik qaammaasaqarluni ataatsimoorullugit sullissilluartarpoq, suliassaminillu ilisimannilluartuuvoq, Qeqqata Kommunia allappoq.
Kajumissaaserneqartut
IT-supporteri, Hans-Jakob Lyberth aamma piniarnermut aalisarnermullu siunnersorti Maniitsumiittoq, Iver Lyberth Qeqqata Kommunianiit kajumissaaserneqarput.
Hans-Jakob Lyberth suliffimmini nuannaalersitsisarnermini ilisimaneqarluarpoq atorfissaqartinneqaleraangamilu sukkasuumik periapallattarluni.
- Ikiuukkumatuujuvoq ataqatigiissitsisinnaassuseqarluarlunilu suliffimmi pitsaasumik atugassaqartitsineq, ataqatigiisitsisinnaassuseq, ikiuisinnaassuseq kajumissaarisinnaassuserlu, aalajaatsumik suleqataassusilik, kajumissaaserneqarneranut tunngavilersuutit ilaatigut taama nipeqarput.
Piniarnermut aalisarnermullu siunnersorti, Iver Lyberth innuttaasunut sullissilluartarnera, eqqissisimasumik, inussiarnersumik inuppalaartumillu periuseqartarnera pissutaalluni nersorneqarpoq.
- Ulluinnarni suliani pillugit Namminersorlutik Oqartussat peqatigalugit, illoqarfitsinni marluusuni nunaqarfitsinnilu ataqatigiissitsisuuvoq. Ilisimasani assigiinngitsut avitseqatigiissutigisarpai, fagiminut pikkorissuaartoq, aamma sulianut allanut tunngasunik aperineqaraangami isummersorluartarpoq. Ukiorpanni suliani itisuumik ilisimasaqarfigilluarlugit borgeservice peqatigisarlugulu suliarivai, Kommuunitsinni ilisimaneqaatigalugu. Qeqqata Kommunia tusagassiuutinut nalunaarummi taama ilisimatitsipput.