Qilalugarniarneq siggartaatinit akornusersorneqartoq
Umiarsuit takornariartaatit qanilllatortut qilalukkanik tatamisitsisut. Umiarsuit ingerlaarfiisa killilerneqarnissaat piniartut piumasaraat.
Ittoqqortoormiit Kangerluani arferit piniartunut akornutaasumik allakkut ingerlaartalersimapput. IA sinnerlugu Inatsisartunut ilaasortaq Harald Bianco malillugu, umiarsuit takornariartaatit arlallit kangerlummut pulasalernerat tamatumunnga peqqutaavoq.
Aasarli pisoq ajornersaavoq, umiarsuit takornariartaatit 15-it ataatsikkungajak kangerlummut pulammata.
- Umiarsuit kangerlummiitillutik qilalukkat qaqortat qernertallu tatamisippaat. Arferit takugaangamikkit ornittarpaat siggartaatitillu atorlugit qimaatitttarlugit, Harald Bianco paragraf 3t tunngavigalugu Naalakkersuisunut apeqquteqarnermini allappoq.
Taamaammat isumaqarpoq umiarsuit takornariartaatit Ittoqqortoormiit Kangerluannut qanoq appakaatsigisassanersut Naalakkersuisut killilertariaqaraat.
Ittoqqortoormiit Kangerluani piniartut isumakuluutigaat umiarsuit takornariartaatit aasaanerani amerliartuinnartillugit arfernut akornutaanerulissasut taamaalillutillu tamaanngaanniit qimaajualissasut, Harald Bianco ilisimatitsivoq. Taanna malillugu piniartut kissaatiginersaavaat umiarsuit qanoq pulasarsinnaatiginersut killilerneqarnissaa.
Harald Bianco'p siunnersuutigaa illuatungaani Milne Land illuatungaanilu Syd Kap killeqarfiusariaqartut.
- Isumaqarpunga piniariartarfiit illersussagutsigit Naalakersuisut aaqqiissummik suliaqartariaqartut. Avanersuarmi Tunumilu piniartut peqqissaarluinnarlutik qilalugarniartarput. Qilalukkanik takunninnginnermi qoorortuuaqqamilluunniit seqqorneq inerteqqutaavoq, Harald Bianco oqarpoq.